Վրաստանի նախկին նախագահ Միխայիլ Սաակաշվիլին հոկտեմբերի 1-ի առավոտյան ֆեյսբուքյան էջում գրառում էր արել, իր համախոհներին բարի լույս մաղթելով Վրաստանից՝ ութ տարի անց: Դա բավականին անսպասելի էր, հաշվի առնելով, որ Սահակաշվիլին հայտարարել էր հոկտեմբերի 2-ին Վրաստան ժամանելու մտադրության մասին, այն էլ ավիաչվերթով՝ ինչպես ազդարարել էր: Իշխանությունը հայտարարել էր, որ ժամանելու պարագայում նա կձերբակալվի և կկալանավորվի: Հայտնի է, որ Սահակաշվիլու դեմ իշխանափոխությունից հետո հարուցվեցին քրգործեր և նա դատապարտվեց հեռակա: Եվ ահա, հոկտեմբերի 2-ի համար իր ավիատոմսը ցուցադրած Սաակաշվիլին հոկտեմբերի 1-ին բարի լույս է ասում Վրաստանից: Սակայն, ավելի ուշագրավ էր այն, որ դրանից կարճ ժամանակ անց Սաակաշվիլին հրապարակում է իր մասնակցությամբ գիշերային տեսանյութ, որում նշում է, որ ինքը Բաթումիում է, և որը փաստորեն վկայում է, որ Սաակաշվիլին Վրաստան է վերադարձել առնվազն սեպտեմբերի 30-ին: Ավելին, մեծ հավանականությամբ նա արել է դա ոչ թե օդային, այլ ցամաքային սահմանով, և Բաթումիում գտնվելը թերևս վկայում է, որ նա այդ սահմանը հատել է Թուրքիայից:
Երբ նա ցուցադրել էր իր ավիատոմսը, Վրաստանում շատ օգտատերեր կարծիք էին հայտնել, որ նախկին նախագահը գուցե այդպիսով շեղում է իր ժամանման իրական՝ ցամաքային տարբերակից: Սակայն, եթե այդ մասին մտածում են շարքային օգտատերեր, առավել ևս բարձրաձայն, ապա առնվազն տարակուսելի կլիներ, եթե այդ մասին չմտածեր իշխանությունը, անվտանգային կառույցները, և այս օրերին չուժգնացնեին ցամաքային սահմանի հսկողությունը, եթե մտադիր են կալանավորել հեռակա դատապարտված Սաակաշվիլուն: Եվ սա էլ իր հերթին հարց է առաջացնում, թե արդյո՞ք Վրաստանի իշխանությունը չի ուժգնացրել ցամաքային սահմանի հսկողությունը, արդյո՞ք Սաակաշվիլին այն հատել է անօրինական տարբերակով՝ ինչը կլինի նրա դեմ մեղադրանքի առիթ, ու պետք չէ բացառել նաև, որ գուցե Վրաստանի իշխանությունն է գիտակցված տվել այդ առիթը: Թե՞ Սաակաշվիլին իրականում Վրաստանում է ավելի վաղուց, մինչ այդ երկրում քննարկում էին նրա հայտարարությունն ու ավիատոմսի ցուցադրությունը: Մեկ այլ հարց կարող է լինել այն, թե ինչ դեր կարող էր ունենալ սահմանի հատման հարցում Թուրքիան: Թերևս անկասկած է, որ Սաակաշվիլու Վրաստանում հայտնվելը պարունակում է այդ երկրում ներքաղաքական իրավիճակի էական, կտրուկ փոփոխության մեծ հավանականություն:
Պնդել դա աներկբա, դժվար է, սակայն ակնհայտ է, որ կա դրա մեծ հավանականությունը, և դարձյալ՝ որոշակի հավանականությամբ, Սաակաշվիլին Վրաստանում հայտնվել է այսպես ասած որոշ խոշոր խաղացողների շահագրգռությամբ, այլապես նրա քայլը կարող է լինել պարզ արկածախնդրություն: Ի դեպ, առնվազն խորհրդանշական կամ հոգեբանական առումով թերևս ուշադրության է արժանի և այն, որ Սոչիում Պուտինի հետ Էրդողանի հանդիպմանը զուգահեռ Կիևում Բայրաքթարների սպասարկման համատեղ ձեռնարկության պայմանագիր կնքող Թուրքիան այդ հանդիպումից հետո փաստորեն կարող է աչքի ընկնել, որպես Պուտինի համար անձնապես մերժելի Սաակաշվիլու Վրաստան մուտքի այսպես ասած «պրովայդեր»: Մի բան թերևս անկասկած է, որ Վրաստանում Սաակաշվիլու վերադարձով խոշոր քաղաքական վերափոխումների պարագայում դրանք ունենալու են ռեգիոնալ ազդեցություն: Ավելին, ինչպես առիթ եմ ունեցել գրելու և խոսելու, հնարավոր է անգամ, որ այդ «ներվրացական սպասումները» արդեն իսկ դրսևորվել են ռեգիոնալ մասշտաբով՝ հայ-ադրբեջանական հակամարտությունում միջնորդության Վրաստանի իշխանության առաջարկի նախաձեռնության տեսքով: