Երգիչ, երաժիշտ Հայկոյի կինը՝ դիզայներ, երգչուհի Անահիտ Սիմոնյանը, որի հետ նրանք բոլորովին վերջերս էին ամուսնալուծվել, բայց պահպանում էին ջերմ ընկերական հարաբերությունները, ինստագրամյան իր էջում հրապարակել է ընտանեկան հանգստից ու ժամանցից տեսանյութեր՝ Հայկոյի ու իրենց համատեղ որդու՝ Արմանի մասնակցությամբ: Սիմոնյանը տեսանյութերին կից հուզիչ գրառումներ է թողել: Դրանցից մեկը ներկայացնում ենք ստորև.
«Ես գիտեմ, որ դու լսում ես ինձ… Ես գիտեմ, որ դու միշտ մոտ կլինես և ականջիս կասես, թե ինչպես վարվել Արմանի հետ: Որովհետև դու ես միայն նրա լեզուն հասկանում, մեզ հաշտեցնում էիր մինչև վերջ՝ ասելով, որ դու ունես երկու երեխա: Երբ մենք վիճում էինք, զանգում էիր ինձ ու ասում.
«Եղիր ավելի մեղմ, գնա, գրկիր, համբուրիր նրան, ապա զանգահարում էիր Արմանին, ասում, որ մայրիկը ճիշտ է, գնա գրկիր, համբուրիր, դու ավելի փոքր ես, տղամարդու պես պետք է անես առաջին քայլը»:
Չնայած մեր անձնական տարաձայնություններին՝ մենք միշտ միասին էինք, և դա երբեք չէր առանձնացնում մեր հոգիները: Մենք արթնանում էինք, դու զանգահարում էիր ինձ, ես արթնանում, զանգահարում էի քեզ, և մինչև քո վերջին օրերը մենք զգացինք, որ աշխարհում չկա իրարից թանկ մարդ, և չի կարող լինել մեկը, ով կկիսվի մեր ուրախությամբ կամ ցավով: Ոչ ոք չի կարողանա հասկանալ և զգալ այն ցավը, որը հավիտյան սպի կդառնա իմ սրտում:
Ես չեմ կարողանա մեր երեխային տալ այն զգացմունքները, որ դու տվել ես նրան, քանի որ ձեր կապն այլ էր: Դուք որպես ամբողջություն սիրում էիք միմյանց և կատակում իմ մասին, որ նորից կսկսեմ ձեզ խանդել: Երանի ես կարողանայի ապրել խանդով ձեր սիրո նկատմամբ իմ ամբողջ կյանքում, բայց քո ներկայությամբ…
Եթե ես ինչ-որ կերպ կարողանայի օգնել քեզ… բայց ես չկարողացա, ներիր ինձ, որ քեզ ոչ մի կերպ չկարողանացա օգնել»:
Մյուս գրառման մեջ Անահիտ Սիմոնյանը կրկին պատմում է որդու՝ Արմանի ու հոր փոխհարաբերությունների ու սիրո մասին և հայտնում, որ որդուն ոչ մի կերպ չի կարողանում հայտնել հոր մահվան մասին ծանր լուրը ու չգիտի՝ ինչպես վարվել:
Հիշեցնենք՝ երգիչ, երգահան, ՀՀ վաստակավոր արտիստ Հայկոն կյանքից հեռացել է երեկ՝ սեպտեմբերի 29-ին:
Մանրամասները՝ տեսանյութում
