Իրանական միջուկային գործարքի մասնակցիները չեն հավաքվի ՄԱԿ-ի գլխավոր վեհաժողովի 76-րդ նստաշրջանի շրջանակում․ պատճառն Իրանի դիրքորոշումն է։ Այս մասին «Известия»-ին հայտնել է դիվանագիտական շրջանակների աղբյուրը։ Նրա խոսքով՝ եվրոպացի մասնակիցները պահանջել են հանդիպում անցկացնել ՄԱԿ-ում բարձր մակարդակի շաբաթվա ընթացքում, սակայն Թեհրանը հրաժարվել է այդ ձևաչափից՝ նախընտրելով բանակցությունները շարունակել Վիեննայում։
«Նախարարական մակարդակի նման հանդիպումներ անցկացվել են ամեն տարի՝ սեպտեմբերի վերջին, բարձր մակարդակի շաբաթվա ընթացքում՝ ՄԱԿ-ի գլխավոր վեհաժողովի նստաշրջանի բացումից անմիջապես հետո։ Սակայն այս տարի իրանցիները հայտարարել են, որ չեն ծրագրում հանդիպել նման մակարդակով, նրանց համար աշխատանքային հարթակ է մնում Վիեննան։ «Հնգյակի» հանդիպման փոխարեն Իրանի ԱԳ նախարարը երկկողմ հանդիպումներ է անցկացրել Ֆրանսիայի, Մեծ Բրիտանիայի գործընկերների և եվրադիվանագիտության ղեկավար Ժոզեպ Բորելի հետ»,-ասել է աղբյուրը։
Նշենք, որ իրանական միջուկային գործարքի հարցով հանդիպման մասին սեպտեմբերի 21-ին հայտարարել էր Ֆրանսիայի ԱԳ նախարար Ժան-Իվ Լը Դրիանը։ Նա նշել էր, որ նախարարական հանդիպումը նոր խթան կհաղորդի իրանական միջուկային խնդրի շուրջ բանակցություններին։
