Մեծ Բրիտանիայի վարչապետ Բորիս Ջոնսոնն ու ԱՄՆ նախագահ Ջո Բայդենը պայմանավորվել են, որ մոտեցումը Ռուսաստանի ու Չինաստանի հանդեպ պետք է հիմնված լինի ընդհանուր արժեքների վրա, որոնք կիսում են Լոնդոնն ու Վաշինգտոնը։ Այս մասին հայտնել է Ջոնսոնի ներկայացուցիչը Սպիտակ տանը երկու քաղաքական գործիչների միջև կայացած բանակցությունների արդյունքներով, փոխանցում է TASS-ը։
Նրա խոսքով՝ Ջոնսոնն անհամբերությամբ սպասում է Բայդենի կողմից ավելի վաղ հայտարարված, դեկտեմբերի 9-10-ը կայանալիք «Հանուն ժողովրդավարության գագաթնաժողովին», որը կօգնի իրականացնել միջազգային գործողություններ։
Առաջիկա գագաթնաժողովին, որը կկայանա տեսակոնֆերանսի ռեժիմում, կքննարկվեն 3 առանցքային թեմաներ՝ պաշտպանությունն ավտորիտարիզմից, կոռուպցիայի դեմ պայքարը, մարդու իրավունքների հանդեպ հարգանքը։
Ընդհանուր արժեքների համատեքստում Ջոնսոնն ու Բայդենը հիշատակել են Ավստրալիայի, Մեծ Բրիտանիայի և ԱՄՆ-ի միջև անվտանգության ոլորտում նոր գործընկերությունը, որը ստացել է AUKUS ավանումը։ Նրանք ընդգծել են այն դերի կարևորությունը, որն այդ դաշինքը կխաղա աշխարհում խաղաղության ու կայունության խթանման գործում։
Ավստրալիային սուզանավեր տրամադրելու վերաբերյալ գործարքի ֆոնին Փարիզը խորհրդակցությունների նպատակով կանչել է իր դեսպաններից ԱՄՆ-ից և Ավստրալիայից։ Ֆրանսիական կողմը Մեծ Բրիտանիայի գործողությունները բնութագրել է որպես պատեհապաշտության դրսևորում։