Քաղաքագետ Տիգրան Գրիգորյանը ֆեյսբուքյան իր էջում գրել է․
Ռուսաստանում քվեաթերթիկների 80 տոկոսից ավելին մշակվել են և արդեն կարելի է խոսել նախնական արդյունքների մասին:
1․ Այս ընտրությունների քիչ թե շատ ինտրիգային հարցերից մեկի պատասխանը ունենք արդեն․ «Միացյալ Ռուսաստանը» կրկին վերցնում է սահմանադրական մեծամասնություն: Ինչպես նախորդ ընտրությունների ժամանակ, այնպես էլ հիմա իշխող ուժը այդ նպատակին հասել է մեծամասնական ընտրատարածքներում հաղթանակի շնորհիվ։ 225 մեծամասնական ընտրատարածքից ավելի քան190-ում հաղթում է ՄՌ-ն: Համամասնականով այս պահին 49․45% են վերցնում (Ռուսաստանում խառը ընտրական համակարգ է: Խորհրդարանի կեսը ընտրվում է համամասնական կարգով, մյուս կեսը՝ մեծամասնական):
2․ Ռուսաստանի կոմունիստական կուսակցությունը վերջին երկու տասնամյակի իր լավագույն արդյունքն է գրանցել (այս պահին՝ 19․8%): Պատճառը այն է, որ ընդդիմադիր տրամադրված զանգվածը հենց Կոմկուսին էր տեսնում որպես քիչ թե շատ այլընտրանքային ուժ: Այսպիսի եզրահանգումը նաև Նավալնիի «խելացի քվեարկության» աշխատանքի արդյունք է: Այդ առումով հետաքրքիր է հետևել, թե ինչպես են ողջ 90֊ականները «կարմիր վտանգի» դեմ պայքարած լիբերալ ինտելիգենցիայի ներկայացուցիչները խոստովանում, որ իրենց քվեն այս ընտրություններին տվել են կոմունիստներին: Կոմկուսին օգնել է նաև կուսակցության ներսում ոչ համակարգային ընդդիմության հետ կապեր ունեցող, ավելի ռադիկալ թևի առկայությունը (Ռաշկին, Լևչենկո, Բոնդարենկո և այլք):
3․ Խորհրդարան է անցնում նաև Ժիրինովսկու Լիբերալ֊դեմոկրատական կուսակցությունը, որը ունի իր կայուն ընտրազանգվածը (այս պահին՝ 7․55%):
4․ «Արդար Ռուսաստանը» ընտրություններից առաջ լուրջ վարկանիշային խնդիրներ ուներ: Այդ իսկ պատճառով նախագահի աշխատակազմում որոշում էր կայացվել Էսեռներին կցել Զախար Պրիլեպինի «Հանուն ճշմարտության» նորաստեղծ կուսակցությունը, որպեսզի հնարավոր լինի ձայներ ստանալ ընտրազանգվածի ոչ միայն ձախ սեգմենտից, այլև «հայրենասիրական»: Պրիլեպինը հայտնի գրող է, ով ակտիվ մասնակցություն է ունեցել Դոնբասի պատերազմին: Այս հաշվարկը ևս ճիշտ է դուրս եկել: «Արդար Ռուսաստան հանուն ճշմարտության» կուսակցությունը առանց խնդիրների անցնում է խորհրդարան (այս պահին՝ 7․37%):
5. Խորհրդարան անցնելու լուրջ շանսեր ունի նաև նորաստեղծ «Նոր մարդիկ» կուսակցությունը (այս պահին 5․37% ունեն): Այս կուսակցության ստեղծման պարագայում նախագահի աշխատակազմը և մասնավորապես Սերգեյ Կիրիենկոն (ով նախագահականում ներքին քաղաքականության պատասխանատուն է) շատ կրեատիվ լուծում են գտել: Կրեմլին ինչ֊որ կերպ անհարժեշտ էր ընտրական պրոցեսի մեջ ներգրավել երիտասարդ ընտրազանգվածին, ինչպես նաև մանր և միջին բիզնեսին: Սակայն ընտրություններից մեկ տարի առաջ նոր կուսակցություն ստեղծելը ու կայացնելը բարդ խնդիր է: Այդ իսկ պատճառով որոշել են այդպիսի խնդիր դնել հայտնի գործարար, «Ֆաբերլիկ» ընկերության հիմնադիր ու սեփականատեր Ալեքսեյ Նեչաևի առջև: Նեչաևը «Ֆաբերլիկի» մասնաճյուղերը Ռուսաստանի տարբեր մասերում դարձրել է կուսակցական շտաբներ և երկրի տարածքում ներկայացվածության առումով միանգամից առաջնային դիրքեր ստանձնել: Կուսակցության ծրագրի մեջ էլ ապաքաղաքական, բայց մոդայիկ գաղափարներ են մտցրել ու այդպես անցնում են Պետդումա:
Ընդհանուր առմամբ պետք է նշել, որ Սերգեյ Կիրիենկոն փայլուն է կատարել իր առջև դրված խնդիրը: Ապահովել է անհրաժեշտ արդյունք՝ առանց ավելորդ ցնցումների: Կոմունիստների բարձր ցուցանիշներն էլ խնդիր չեն:
Զյուգանովը իր կուսակցության ներսի դիսիդենտներին հարկ եղած դեպքում լռեցնելու է: Մի խոսքով՝ համակարգը դեռևս կայուն ու կառավարելի է: