«Հյուսիսափայլ» պարբերականի փոխանցմամբ՝ Լոս Անջելեսի դաշնային շրջանային դատարանը որոշում է կայացրել թուրքական իշխանությունների դեմ երեք հայերի ներկայացրած հայցի առնչությամբ, որով պարտավորեցրել է Անկարային պատասխանող կողմ դառնալ դատական գործընթացում: Այս մասին հաղորդել է Հայկական հիշատակության կենտրոնը (Center for Armenian Relief)։
Վերջինս դատարանի այդ որոշումը մեկնաբանել է որպես «հայկական հայցվոր կողմի առաջին հաղթանակը» ծանր և ամենայն հավանականությամբ բավական տևական դատական գործընթացում։ Դատարանը մեղադրվող կողմին պատավորեցրել է մինչև օգոստոսի 19-ը ներկայացնել պաշտպանությունը։
Հիշեցնենք, որ 2010 թվականի դեկտեմբերին փաստաբան Վարդգես Եղիայանն ամերիկաբնակ երեք հայերի կողմից դատական հայց ներկայացրեց Թուրքիայի կառավարության ու այդ երկրի երկու խոշորագույն բանկերի (Կենտրոնական ու Գյուղատնտեսական) դեմ։
Հայցվորները, որոնցից մեկը փաստաբանի կինն է, նշել են, որ Ադանայում իրենց պապերին է պատկանել 49.5 հեկտար հողատարածք, ուր ներկայումս տեղակայված է ամերիկյան ռազմաբազան (Ինջիրլիք), ինչի շնորհիվ Թուրքիան մեծ եկամուտներ է ստանում։
Ամերիկահայերն ընդգծել են, որ 1915 թվականին այդ տարածքը խլվել է իրենց պապերից, ինչի համար էլ իրենք այժմ Թուրքիայի կառավարությունից ու թուրքական բանկերից պահանջում են 63 միլիոն 900 հազար դոլարի փոխհատուցում։
Անկասկած է, որ թուրքական կողմն ամեն գնով պայքարելու է դատը շահելու համար՝ վախենալով, որ հակառակ դեպքում դա նախադեպ կդառնա նմանատիպ բազմաթիվ դատական հայցերի համար։