Օտար մարմինները, մտնելով օրգանիզմ, կարող են առաջացնել տարբեր բարդություններ:
Դրանք նախ և առաջ քաղցկեղածին են, քանի որ ներծծվում են բոլոր հյուսվածքներ, անգամ կարող են առաջացնել լոկալ տեղային խիստ բարդություններ, որոնցից հնարավոր չէ ազատվել: Մեկնաբանելով հայ աղջիկների ու կանանց շրջանում լայն տարածում գտած բոտեքսի սրսկումներն ու շրթունքների արհեստական մեծացման՝ օրեցօեր աճող միտումը, «Առաջին լրատվականի» հետ զրույցում ասաց Կոսմետոլոգիայի ու պլաստիկ վիրաբուժության կենտրոնի պլաստիկ վիրաբույժ Հրաչ Կոստանյանը:
«Դրանք գնում-ներծծվում են բոլոր հյուսվածքների մեջ, ներխուժում են տարբեր օրգաններ և հանգեցնում խայտառակ հետևանքների»,- ասաց նա՝ ընդգծելով, որ ներկայում դրանց օգտագործումը չի թույլատրվում Ռուսաստանում, իսկ մեզանում բժիշկների մեծ մասը «տակառներով բերում է այդ նյութերը և այստեղ-այնտեղ սրսկում. ու չեն էլ ասում, որ դա չի կարելի»:
«Մի բան, որ ժամանակավոր է, կարող է առաջացնել տվյալ օրգանի խիստ դեֆորմացիա՝ կնճռոտում, նույնիսկ քայքայման պրոցես, ինչը հնարավոր չէ ետ շրջել»,- նկատեց պլաստիկ վիրաբույժը՝ ընդգծելով, որ եթե բժիշկներն ասեն, որ դա վնասակար է, մարդիկ չեն դիմի այդ քայլին, սակայն ճիշտ հակառակն են անում, ասում են՝ մի սրսկումով ամեն ինչ կվերացնենք:
«Ահա հայ պլաստիկ վիրաբուժության ողբերգական վիճակը»,-նկատեց վերջինս՝ հավելելով, որ մեզանում ամեն ինչ դարձյալ գալիս ու հանգում է փողին:
