Հայաստանի վարչապետ Նիկոլ Փաշինյանն ու Վրաստանի վարչապետ Իրակլի Ղարիբաշվիլին Փաշինյանի Վրաստան կատարած պաշտոնական այցի շրջանակում տեղի ունեցած հանդիպմանը մտքեր են փոխանակել երկու երկրների ներքաղաքական իրավիճակների շուրջ: Այդ մասին տեղեկությունն առկա է պաշտոնական հաղորդագրությունում: Սա որոշակիորեն աննախադեպ, կամ առնվազն ոչ սովորական հանգամանք է, երբ արտերկիր պաշտոնական այցի շրջանակում քննարկվում են ներքաղաքական իրավիճակներին առնչվող հարցեր: Սակայն, այդ ոչ սովորական իրավիճակն ունի թերևս իր ոչ զարմանալի բացատրությունը: Հայաստանի և Վրաստանի վարչապետները քննարկել են երկկողմ և ռեգիոնալ բազմակողմ գործակցության առնչվող հարցեր, մասնավորապես Իրան-Հայաստան-Վրաստան-Բուլղարիա-Հունաստան հնգակողմ տրանսպորտային հաղորդակցության հեռանկարի վերաբերյալ, քննարկելով այդ ուղղությամբ հնգակողմ համաձայնագրի պատրաստման աշխատանքը ակտիվացնելու հարցը:
Բանն այն է, որ հայ-վրացական թե երկկողմ, թե ռեգիոնալ նշանակության գործակցության հեռանկարները ոչ բոլոր խաղացողների համար են ոգևորիչ և հաճելի: Իսկ դա նշանակում է, որ կան մի շարք սուբյեկտներ, որոնք շահագրգռված չեն այդ գործակցության խորացումով: Մասնավորապես, խոսքն այս դեպքում վերաբերում է հատկապես երկու առանցքային դերակատարի՝ Թուրքիային ու Ռուսաստանին, որոնք փորձում են բաժանել Կովկասը և այդ «բաժանման» տիրույթում է ոչ միայն Հայաստանը, այլևս Վրաստանը, պարզապես համեմատաբար «պասիվ» բաժանման տիրույթում: Եվ այստեղ է, որ ներքաղաքական իրավիճակների հարցը դառնում է ոչ միայն, և գուցե նույնիսկ ոչ այնքան ներքին հարց:
Բանն այն է, որ ներքաղաքական իրողությունները Հայաստանի և Վրաստանի նկատմամբ արտաքին ազդեցության լծակներ են, ըստ այդմ՝ նաև հայ-վրացական ընդհանուր աշխատանքի վրա ուղիղ, կամ անուղղակի ազդելու լծակներ: Թե այդ առումով ինչ են քննարկել, ինչ շեշտադրումներ կամ շերտեր են շոշափել ներքաղաքական իրողությունների մասին «մտքեր փոխանակած» երկու վարչապետները, պարզ չէ: Ուշադրության է արժանի թերևս այն, որ երկու երկրներում առաջիկայում ՏԻՄ ընտրության փուլ է, որը իր աստիճանակարգով զիջում է իհարկե համապետական ընտրական գործընթացին, սակայն այդուհանդերձ ունի ներքին քաղաքական բավականին նուրբ շերտեր ու լարեր, որոնց վրա «նվագել» կամ «երաժշտություն պատվիրել» կցանկանան շատերը: