Եվրամիության կողմից ընդհանուր ռազմական ուժի ստեղծումը կարող է պառակտել Եվրոպան և թուլացնել ՆԱՏՕ -ն: Այդ մասին ՆԱՏՕ-ի գլխավոր քարտուղար Յենս Ստոլտենբերգն ասել է Sunday Telegraph- ին տված հարցազրույցում։ Հաղորդում է ՏԱՍՍ-ը։
«Ես ողջունում եմ եվրոպական պաշտպանական ջանքերը, բայց այն երբեք չի կարող փոխարինել ՆԱՏՕ-ին: Բացի դրանից, անհրաժեշտ է երաշխավորել, որ Եվրոպան և Հյուսիսային Ամերիկան միասին մնան: Հյուսիսամերիկյան-եվրոպական կապը թուլացնելու ցանկացած փորձ ոչ միայն կթուլացնի ՆԱՏՕ-ն, այլ նաև Եվրոպան կպառակտի,- ասել էՍտոլտենբերգը,- իսկ ինչ վերաբերում է փողին, մեր պաշտպանական ծախսերի 80% -ը բաժին է ընկնում մեր այն դաշնակիցներին , որոնք ԵՄ անդամ չեն հանդիսանում»:
Ավելի վաղ ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելը հաստատել էր,որ սեպտեմբերի 2 -ին Լյուբլյանայում կայացած ԵՄ պաշտպանության նախարարների ոչ պաշտոնական հանդիպմանը քննարկվել է նոր պաշտպանական համակարգի հայեցակարգը և ԵՄ արագ արձագանքման ուժերի ստեղծման ծրագրերը: Նրա խոսքով, առաջին գործնական որոշումները կկայացվեն հոկտեմբեր-նոյեմբեր ամիսներին ՝ «ԵՄ ռազմավարական կողմնացույց» եվրոպական անվտանգության նոր հայեցակարգի նախապատրաստման շրջանակներում: Այս ռազմավարության հաստատումը և դրա հետ մեկտեղ ԵՄ արագ արձագանքման ուժեր ստեղծելու ծրագրերը պետք է իրականացվեն 2022 թվականի մարտին: Նա ընդգծել է, որ խոսքը մոտ 5 հազար հոգանոց խմբի մասին է:
