Ռուսաստանի արտաքին գործերի նախարար Սերգեյ Լավրովն ուշագրավ պատասխան է տվել լրագրողի այն հարցին, թե երբ է վերականգնվելու ԵԱՀԿ Մինսկի խմբի ֆորմատը: ՌԴ արտաքին գերատեսչության ղեկավարը, մասնավորապես նշել է, որ հարցը պետք է ուղղել կողմերին:
«Հելսինկյան-92» արցախյան կոմիտեի համակարգող, արցախցի իրավապաշտպան Կարեն Օհանջանյանի կարծիքով՝ Ռուսաստանը չի ցանկանում բանակցությունների վերսկսում ԵԱՀԿ Մինսկի խմբի շրջանակներում. «Քանի որ ցանկացած բանակցային գործընթաց, վերջնարդյունքում ենթադրում է հակամարտության կարգավորման հետ կապված որևէ փաստաթղթի ստորագրում՝ Ռուսաստանին դա ձեռնտու չէ: Այդ ժամանակ պրոցեսին պետք է մասնակից լինեն ոչ միայն Հայաստանը, Ադրբեջանը, Ռուսաստանը, այլ նաև Մինսկի խմբի արևմտյան համանախագահները՝ Միացյալ Նահանգներն ու Ֆրանսիան՝ որպես Եվրամիության ներկայացուցիչ: Ռուսաստանը օկուպացրել է Լեռնային Ղարաբաղը և նրան ձեռնտու չէ ԵԱՀԿ Մինսկի խմբի համանախագահության ձևաչափի վերականգնում, նրա դերն այդպիսով կնվազի: Դրա համար էլ Սերգեյ Լավրովը նման հայտարարություն է անում՝ հորդորելով հարցն ուղղել հակամարտության կողմերին»,-«Առաջին լրատվական»-ի հետ զրույցում ասաց նա:
Ըստ մեր զրուցակցի՝ եղել են ժամանակներ, երբ բանակցային գործընթացը որոշակի ժամանակահտավծով գտնվել է ստագնացիայի մեջ, համանախագահները տարաշածրջան չէին գալիս, բայց ինքնին բանակցային գործընթացը կանգ չէր առնում. «Այժմ բոլորի համար է հստակ, որ Լեռնային Ղարաբաղի հակամարտությունը կարգավորված չէ: Ես ոչ մեկ անգամ եմ նշել, որ անկախ նրանից՝ Ռուսաստանը կուզի թե ոչ, երկու-երեք տարիների ընթացքում կսկսվի բանակցային ինտենսիվ գործընթաց, Ռուսաստանն էլ ստիպված է լինելու մասնակցել այդ պրոցեսին: Իսկ վերջնարդյունքում՝ Ռուսաստանի կողմից Լեռնային Ղարաբաղի օկուպացումը կմնա անցյալում, քանի որ այնտեղ կտեղակայվեն միջազգային խաղաղապահ ուժեր»:
