ԱՄՆ պաշտպանության նախարարության խոսնակ, գեներալ Քենեթ Մաքքենզին հայտարարել է Աֆղանստանից ամերիկյան զորքերի տարհանման և երկրում Միացյալ Նահանգների ռազմական առաքելության ավարտի մասին: Ճեպազրույցը հեռարձակվել է Պենտագոնի յութուբյան ալիքով։
«Ես այսօր այստեղ եմ ՝ հայտարարելու Աֆղանստանից մեր զորքերի դուրսբերման և ԱՄՆ-ի, այլ երկրների քաղաքացիների տարհանման գործողության ավարտի մասին», – ասել է նա՝ հավելելով, որ վերջին ինքնաթիռը հեռացել է Աֆղանստանից:
Ինչպես նշել է գեներալը, սա «2001 թվականի սեպտեմբերի 11-ից կարճ ժամանակ անց Աֆղանստանում սկսված գրեթե 20-ամյա առաքելության ավարտն է»: Իսկ ավելի հստակ՝ ԱՄՆ-ի ներկայությունն Աֆղանստանում տևել է 19 տարի, 10 ամիս, 25 օր։
Թալիբների կողմից իշխանությունը զավթելուց հետո Աֆղանստանից տարհանվել է ավելի քան 123 հազար մարդ, այդ թվում ՝ 5400 ամերիկացի: Նրանք դուրս են բերվել 26 ամերիկյան C-17 ինքնաթիռներով: Այս մասին հայտարարել է գեներալ Ուիլյամ Հենք Թեյլորը։
Ավելի վաղ ԱՄՆ Դաշնային ավիացիոն վարչությունը հայտարարել էր, որ ԱՄՆ-ն այլևս չի վերահսկում Քաբուլի օդանավակայանը: