Կոնֆերենցիաների լիգայի խմբային փուլում Հայաստանի չեմպիոն «Ալաշկերտը» հայտնվեց A խմբում, որտեղ ընդգրկված են նաև ավստրիական ԼԱՍԿ-ի, Թել Ավիվի «Մաքաբիի» ու Ֆինլանդիայի ՀԻԿ-ը: Մեծ հաշվով վիճակահանության արդյունքները կարելի է համարել նորմալ, հաշվի առնելով, որ խմբային փուլում թույլ թիմեր չկան։ Փորձենք հասկանալ ինչ են իրենցից ներկայացնում Հայաստանի չեմպիոնի մրցակիցները, գնահատել նաև մեր հնարավորությունները։ ԼԱՍԿ-ը նախորդ մրցաշրջանի Ավսրիայի փոխգավաթակիրն է, որը հնարավորություն է տվել մասնակցել Կոնֆերենցիաների լիգային։ Որակավորման երրորդ փուլում ավտրիական ակումբը երկու հանդիպումների արդյունքում 7։1 հաշվով առավելության է հասել սերբական «Վոյվոդինայի» նկատմամբ։ Փլեյ-օֆֆում էլ ԼԱՍԿ-ը երկու հանդիպումներում 3:1 հաշվով առավելության է հասել շոտլանդական «Սենտ Ջոնսթոնի» նկատմամբ։
Ասել, որ ԼԱՍԿ-ը անհաղթահարելի է մրցակից է «Ալաշկերտի» համար ճիշտ չի լինի։ «Մաքքաբին» Իսրայելի փոխչեմպիոնն է և Կոնֆերենցիաների լիգայում պայքարը սկսել է որակավորման երկրորդ փուլից։ Այստեղ իսրայելական թիմը մրցել է Չեռնոգորիայի «Սուտիեսկայի» հետ և երկու հանդիպումներում հաղթել է 3։1 հաշվով։ Այնուհետև ընդհանուր 1։0 հաշվով հաղթել է Սլովակիայի «Տրնավային», դուրս գալով փլեյ-օֆֆ։ Կոնֆերենցիաների լիգայի խմբային փուլում «Մաքաբին» հայտնվել է երկու հանդիպումների արդյունքում 4։1 հաշվով առավելության հասնելով Կարագանդային «Շախտյորի» նկատմամբ։ Եվ վերջապես, ՀԻԿ-ը անցյալ տարի 30-րդ անգամ նվաճելով Ֆիլնադիայի չեմպիոնի կոչումը ռեկորդ է սահմանել։ ՀԻԿ-ը պայքարը սկսել Չեմպիոնների լիգայի խաղարկության որակավորման երկրորդ փուլից, որտեղ լարված պայքարում ընդհանուր 4։3 հաշվով զիջել է Շվեդիայի չեմպիոն «Մալմյոյին»։ Հայտնվելով Եվրոպա լիգայում Ֆինլանդիայի չեմպիոնը որակավորման երրորդ փուլում երկու հանդիպումների արդյունքում 5։2 հաշվով հաղթել է Ադրբեջանի չեմպիոնի Բաքվի «Նեֆթչիին»»։ Եվրոպա լիգայի փլեյ-օֆֆում ՀԻԿ-ին բաժին էր հասել թուրքական «Ֆեներբախչեն»։ Ստամբուլում 1։0 հաշվով զիջելուց հետո «Ալաշկերտի» մրցակիցը թուրքական թիմին Հելսինկիում պարտվել է արդեն 2։5 հաշվով և հայտնվել Կոնֆերենցիաների լիգայի խմբային փուլում։
ՀԻԿ-ը մեկ անգամ չէ, որ մրցել է հայկական թիմերի հետ։ Այս թիմը դավանում է ամուր՝ ուժային ֆուտբոլ և «Ալաշկերտի» համար բավական անհարմար մրցակից է։ Կարող ենք ասել, որ խմբային փուլում մեզ բաժին հասած մրցակիցները կարգով զիջում են «Գլազգո Ռենջերսին», որին «Ալաշկերտը» պարտվեց Եվրոպա լիգայի փլեյ-օֆֆում։ «Ռենջերսի» դեմ «Ալաշկերտը» ապացուցեց, որ կարող է ձեռնոց նետել կարգով մի քանի անգամ ավելի ուժեղ մրցակիցներին։ Սթափ գնահատելով վիճակահանությունը նշենք, որ Հայաստանի չեմպիոնը ի զորու է պայքարել ենթախմբում 1-2-րդ տեղերի համար։
Ինչ-խոսք «Ալաշկերտին» չէին խանգարի համալրումները։ Չմոռանանք, որ այս թիմը զուգահեռաբար ելույթ է ունենում նաև Հայաստանի առաջնությունում։