Իտալիայի հարավում մոլեգնող անտառային հրդեհների զոհ է դարձել 5 մարդ: РИА Новости գործակալության փոխանցմամբ՝ այս մասին հաղորդում են իտալական լրատվամիջոցները:
Մահացածների ցանկում վերջինը 77-ամյա թոշակառու Մարիո Ձավալիոն է, որի մոխրացած մարմինը հայտնաբերվել է Կալաբրիայի Գրոտերիա քաղաքի մոտակայքում: Ըստ ամենայնի, տղամարդը անհաջող կերպով փորձել է մարել իր տանը մոտեցած կրակը, որպեսզի փրկի անասուններին:
Ամենալուրջ վիճակն այժմ Կալաբրիայի հարավում է: Տեղի գործադիր իշխանությունները դիմել են Հռոմին՝ այնտեղ արտակարգ դրություն մտցնելու խնդրանքով: Մարզային իշխանություններին հատկապես մտահոգում են Ասպրոմոնտե լեռնաշղթայի տարածքում մի քանի օր շարունակ մոլեգնող հրդեհները, որոնք ոչնչացրել են հազարավոր հեկտար անտառներ և արոտավայրեր: Հենց այնտեղ էլ հայտնաբերվել են վերջին երկու զոհերը:
Գործակալությանը հաղորդել են, որ կրակը սպառնում է հաճարենու անտառներին, որոնք հուլիսին ներառվել են ՅՈՒՆԵՍԿՕ-ի համաշխարհային ժառանգության ցանկում:
Իտալիայի հարավում հրդեհներ են բռնկվել անոմալ տապի պատճառով: Տաք օդային զանգվածներն այստեղ է բերել աֆրիկյան անտիցիկլոնը, որը օդերևութաբաններն անվանել են «Լյուցիֆեր»: Արդյունքում, երկրի շատ շրջաններում ջերմաստիճանը հասել է 45 աստիճան Ցելսիուսի: Չորեքշաբթի օրը բացարձակ եվրոպական ռեկորդ է սահմանվել Սիցիլիայի Ֆլորիդիա քաղաքում, որտեղ օդի ջերմաստիճանը ցերեկվա ժամը երկուսին հասել է 48,8 աստիճանի:
Երկրի մի շարք խոշոր քաղաքներում օդերևութաբանական վտանգի առավելագույն՝ «կարմիր» մակարդակ է սահմանվել:
