«Առաջին լրատվական»-ի տեղեկություններով, Ձերբակալվածների ժամանակավոր պահման մեկուսարանից Կենտրոն – Նորք-Մարաշ առաջին ատյանի դատարան տեղափոխված ՀԱԿ ակտիվիստներ Տիգրան Առաքելյանի, Արտակ Կարապետյանի, Սարգիս Գևորգյանի և Վաhագն Գևորգյանի նկատմամբ դատարանը կընտրի կալանքը որպես խափանման միջոց։
ՀԱԿ Երիտասարդ ակտիվիստներ Դավիթ Քիրամիջյանին, Արեգ Գևորգյանին, Սահակ Մուրադյանին ստորագրությամբ ազատ կարձակեն:
Ի դեպ, Վահագն Գևորգյանը մեր գործընկերոջ՝ «Հայկական ժամանակ» օրաթերթի լրագրող Հայկ Գևորգյանի որդին է։
Քիչ առաջ դատարանի առաջ ելույթով հանդես եկավ «Հայկական ժամանակ» օրաթերթ խմբագիր Նիկոլ Փաշինյանը, որը նշեց, որ կալանավորված երիտասարդները ինչպես եղել են, այնպես էլ շարունակելու են մնալ պայքարի առաջին գծում։ Նիկոլ Փաշինյանի գնահատմամբ, ոստիկանապետ Ալիկ Սարգսյանի երեկվա ելույթից պարզ է դառնում, որ այսօր ոստիկանության միակ գործը ընդդիմադիրներ որսալն է։
«Այս բոլորից հետևում է, որ իշխանությունը երկխոսություն չի ուզում։ Երկխոսությունն այս իշխանության վերջին շանսն էր, բայց եթե նրանք երկխոսություն չեն ուզում, ուրեմն նրանց դուրս կշպրտի Ազատության հրապարակը»,-ելույթն ամփոփեց Նիկոլ Փաշինյանը։
«Առաջին լրատվական»-ի թղթակցի փոխանցմամբ՝ չորս ակտիվիստները՝ Տիգրան Առաքելյանը, Արտակ Կարապետյանը, Վահագն Գևորգյանը և Սարգիս Գևորգյանը դեռևս գտնվում են դատարանի շենքում։
