Ադրբեջանական Turan լրատվական գործակալության փոխանցմամբ՝ Ադրբեջանում մեկնարկել է իսլամիստների ձերբակալության ալիքը։ Գիշերը ձերբակալվել են Ադրբեջանի իսլամական կուսակցության (ԱԻԿ) փոխնախագահ Արիֆ Գանիևն ու նրա որդի Յաշարը։
Նրանց բռնի ուժով նստեցրել են ավտոմեքենա և տարել անհայտ ուղղությամբ։ Գանիևների տանը կատարվել է խուզարկություն։ Հետագայում պարզվել է, որ նրանց տարել են Ազգային անվտանգության նախարարության Սումգայիթի բաժանմունք։ Ժամեր անց Յաշար Գանիևին բաց են թողնել։
Նշվում է, որ երեկ երեկոյան ձերբակալվել է ևս մեկ հավատացյալ՝ Աբդուլ Սուլեյմանովը։ Իսկ քաղաքացիական հագուստով անձինք ձերբակալել են İslamazeri.az կայքի խմբագիր Ռամին Բայրամովին։ Վերջինիս տանը կատարված խուզարկության արդյունքում հայտնաբերվել է ձեռքի նռնակ, ատրճանակ, թմրանյութ։
Հիշեցնենք, որ ԱԻԿ-ը հիմնադրվել է 1991 թվականին և պաշտոնապես գրանցվել 1992 թվականին։
Ուշագրավն այն է, որ Ադրբեջանում իսլամիստների ձերբակալության այս ալիքը տեղի է ունենում վերջին շրջանում իսլամական հենքի վրա իրանա-ադրբեջանական հակամարտության ֆոնին։
