Երասխում լարվածության ֆոնին հրաժարական տվեց պաշտպանության նախարար Վաղարշակ Հարությունյանը: Որքանով էր ճիշտ նման լարված պահին նախարարի հրաժարականը: Այս խնդրի շուրջ «Առաջին լրատվական»-ը զրուցել է քաղաքագետ Ռոբերտ Ղևոնդյանի հետ, ով նշեց. «Մենք ոչ թե պետք է գնահատենք, արդյոք այս պահին փոփոխությունների գնալը ճիշտ էր, թե սխալ, այլ շատ ավելի կարևոր է, թե ով է նշանակվելու պաշտպանության նախարար: Եթե նշանակվելու է այնպիսի կոմպետենտ անձ, որը կկարողանա իրավիճակն իր ձեռքը վերցնել և ռազմական ոլորտը կարգի բերել, ես կարծում եմ՝ դա նույնիսկ անհրաժեշտություն է»:
Քաղաքագետի խոսքով, սպասելի էր, որ պաշտպանության նախարարը հրաժարական է տալու. «Ես ճիշտն ասած, ենթադրում եմ, որ հնարավոր է նաև գլխավոր շտաբի պետի փոփոխություն լինի՝ առաջին հերթին կապված ընտրություններից հետո նոր կառավարության ձևավորման, և երկրորդ հերթին կապված այն իրադարձությունների հետ, որոնք տեղի են ունենում հայ-ադրբեջանական սահմանին:
Այս հրաժարականը եղավ ճիշտ ժամանակին, ՍԴ որոշումից հետո, երբ արդեն պարզ էր, որ նոր կառավարություն է ձևավորվելու և Վաղարշակ Հարությունյանն էլ անցումային նախարար էր, որը նշանակվել էր պատերազմից հետո ընդամենը որոշակի կայունություն ապահովելու համար: Որոշակի կայունություն Հայաստանի բանակում եղավ, երկու անգամ զորակոչ ու զորացրում իրականացվեց: Կարծում եմ, արդեն ժամանակն էր անցումային նախարարին փոխարինելու հիմնական և խնդիրներ լուծող նախարարով: Վաղարշակ Հարությունյանը նշանակվել էր մինչև կառավարության վերալեգիտիմացումը: Այժմ վերալեգիտիմացումը փաստ է, պետք է լինի նոր կառավարություն, նոր պաշտպանության նախարար, որը պետք է իրավիճակի վերաբերյալ հստակ տեսլական ունենա, ռազմավարության իրականացման սեփական ուղիները, սեփական հնարավորությունները բերի և փորձի վերականգնել բանակը, որովհետև առաջիկայում մեզ սպասվում են խնդիրներ, որոնց համար մեզ ուղղակի անհրաժեշտ է ունենալ ուժեղ բանակ»,-հայտարարեց Ռոբերտ Ղևոնդյանը:
Ինչ վերաբերում է նրան, որ կարծես կառավարության ընտրությունը կանգ է առել Արշակ Կարապետյանի վրա, ով արդեն նշանակվել է պաշտպանության նախարարի առաջին տեղակալ, քաղաքագետն ասաց. «Եթե իշխանությունը տեսել է նման որակներ, և որոշել է Արշակ Կարապետյանին առաջադրել այդ պաշտոնին, հույս ունենանք, որ կկարողանա իրականացնել իր առջև դրված խնդիրը»:
Մամուլը գրում էր նաև, որ նախարար կարող է նշանակվել Սամվել Բաբայանը: Այս առնչությամբ Ռոբերտ Ղևոնդյանն ասաց. «Սամվել Բաբայանի թեկնածությանը դեմ չեմ, նա բավականին փորձառու ռազմական գործիչ է և ունի հստակ տեսլական ռազմական գործի հետ կապված: Ես կարծում եմ՝ նշված մասնագետի կողմից ղեկավարվելու դեպքում հնարավոր է իրականացնել այն առաջնահերթ խնդիրները, որոնք այս պահին կանգնած են ՀՀ ՊՆ-ի առջև:
Գուցե իշխանությունը գտնի այլ թեկնածու ևս, որը կկարողանա դա իրականացնել: Ամեն դեպքում առաջնահերթ գործոնը, որի հիման վրա պետք է ընտրություն կատարել, պետք է լինի պրոֆեսիոնալիզմը և նշված խնդիրներն իրականացնելու կարողությունը: Նոր նախարչարը պետք է կարողանա իրականացնել այդ բարեփոխումները և Հայաստանի բանակը վերադարձնել տարածաշրջանում հաղթող բանակի կարգավիճակը»: