Լուսնի ուղեծրի սպասվող փոփոխությունները կարող են Երկիր մոլորակի վրա ջրհեղեղների պատճառ դառնալ: Այս մասին հայտարարել են NASA-ն և Հավայան համալսարանի գիտնականները:Նրանց կատարած ուսումնասիրությունների արդյունքները հրապարակվել են Nature Climate Change. ամսագրում:
Գիտնականները եկել են եզրակացության, որ այդ փոփոխություններն ամենայն հավանականությամբ տեղի կունենան 2030 -ական թվականներին, իսկ հետևանքները ավերիչ կլինեն ԱՄՆ քաղաքների ենթակառուցվածքների համար:
Միևնույն ժամանակ հետազոտության արդյունքներում նշվում է, որ լուսնային տատանումները բնական երևույթ են: Լուսնի ուղեծիրը փոխվում է յուրաքանչյուր 18,6 տարին մեկ: Առաջին անգամ այս երևույթը և դրա վտանգավոր հետևանքները նկարագրվել են 1728 թվականին:
Գիտնականները նաև նշում են, որ այս անգամ Լուսնի ուղեծրի սպասվող փոփոխությունն առավել մեծ անհանգստության առիթ է տալիս: Սա պայմանավորված է Համաշխարհային օվկիանոսի մակարդակի բարձրացմամբ, ինչը գլոբալ տաքացման հետևանք է:
