ԵՄ-ն եղել և մնում է Հայաստանի առանցքայի գործընկերներից մեկը,-ասուլիսում հայտարարել է փոխվարչապետի պաշտոնակատար Մհեր Գրիգորյանն՝ ամփոփելով Եվրոպական հանձնաժողովի հարևանության և ընդլայնման հարցերով հանձնակատար Օլիվեր Վարհեիի հետ ունեցած աշխատանքային հանդիպումների արդյունքները:
«Հայաստանը երախտապարտ է ԵՄ-ին, թե՛ կորոնավիրուսի դեմ պայքարի, թե՛ Արցախի դեմ սանձազերծած պատերազմից տուժած մեր հայրենակիցներին օժանդակելու նպատակով տրամադրված հումանիտար աջակցության համար»,-ասաց Մհեր Գրիգորյանն՝ ավելացնելով, որ հանձնակատարի հետ քննարկել են Արցախի դեմ իրականացված ծանրագույն ռազմական ագրեսիայի և հետպատերազմյան իրավիճակի մեղմանն ուղղված հետագա գործողությունները:
Կարևորվել է Ադրբեջանում պահվող ռազմագերիների և քաղաքացիական անձանց միջազգային մարդասիրական իրավունքի ուժով, առանց նախապայմանների անհապաղ վերադարձը, ինչը՝ Մհեր Գրիգորյանի ներկայացմամբ՝ ամրագրված է 2020 թվականի նոյեմբերի 9-ի եռակողմ հայտարարության մեջ:
«Վերահաստատելով ժողովրդավարության, մարդու իրավունքների գերակայությունների հանդեպ Հայաստանի ստանձնած պարտավորությունները՝ համաձայնագրի արդյունավետ կիրարկումը, վստահ եմ, մեծ դեր կունենա նաև այս բարեփոխումների շարունակականությունն ապահովելու գործում»,-ասաց փոխվարչապետի պաշտոնակատարը:
Մհեր Գրիգորյանը ՀՀ կառավարության անունից շնորհակալություն հայտնեց ԵՄ-ին Հայաստանին հատկացվելիք 1.6 մլրդ եվրո աջակցության հանձնառության համար:
Նա նշեց, որ աջակցությունն ուղղվելու է ՀՀ կառավարության և ԵՄ-ի սահմանած 5 առաջնահերթ նախաձեռնություններին՝ փոքր և միջին ձեռնարկություններին աջակցությանը, Հյուսիս-հարավ մայրուղու և աջակցող ենթակառուցվածների կառուցմանը, հարավային շրջանների սոցիալ-տնտեսական զարգացմանը, թվային կառավարմանը և նորարարության խթանմանը, ինչպես նաև Երևանի՝ որպես կանաչ և խելացի քաղաք զարգացմանը։
