Ռուսաստանը, Իրանը և Թուրքիան անհրաժեշտ են համարում սիրիական Իդլիբում խաղաղության պահպանումը, համաձայնագրերի ամբողջությամբ իրականացումը, նշվում է Սիրիայի հարցով բանակցությունների հերթական փուլի արդյունքներով Աստանայի ձևաչափով երաշխավոր երկրների համատեղ հայտարարության մեջ։
Սիրիայի շուրջ բանակցությունների տասնվեցերորդ փուլը տեղի է ունենում հուլիսի 7-8-ը: Հանդիպմանն անդրադարձ է կատարվել Սիրիայում տիրող իրավիճակին վերաբերող թեմաներին, ներառյալ մարդասիրական, տնտեսական, բժշկական օգնության, ինչպես նաև միջազգային մարդասիրական օգնության, Ժնևում սահմանադրական հանձնաժողովի աշխատանքի վերսկսման և վստահության վերականգնման հնարավոր գործընթացների, ներառյալ գերեվարվածների և պատանդների փոխանակման գործընթացը:
«Նրանք վերահաստատեցին իրենց վճռականությունը՝ դիմակայելն անջատողականական ծրագրերին, որոնք ուղղված են Սիրիայի միասնության խաթարմանը և հարևան երկրների ազգային անվտանգության սպառնալիքին»,- ասվում է հայտարարության մեջ:
Կողմերը համաձայնել են, որ Սիրիայի հյուսիս-արևելքում երկարաժամկետ անվտանգության և կայունության ձեռքբերումը հնարավոր է միայն Սիրիայի ինքնիշխանության և տարածքային ամբողջականության պահպանման հիման վրա:
«Մենք մանրամասնորեն ուսումնասիրեցինք Իդլիբի դեէսկալացման գոտում տիրող իրավիճակը և շեշտեցինք Իդլիբի շուրջ գոյություն ունեցող բոլոր համաձայնագրերի լիարժեք իրականացման միջոցով «տեղում» խաղաղության պահպանման անհրաժեշտությունը»,- ասված է հայտարարության մեջ։
«Իրանի Իսլամական Հանրապետության, Ռուսաստանի Դաշնության և Թուրքիայի Հանրապետության ներկայացուցիչները՝ որպես Աստանայի ձևաչափի երաշխավոր երկրներ, վերստին դժգոհություն են հայտնում անօրինական բռնագրավման և նավթային եկամուտների փոխանցման հետ կապված, որոնք պետք է պատկանեին Սիրիայի Արաբական Հանրապետությանը»,- ասվում է Նուր-Սուլթանում ստորագրված հայտարարության մեջ։
«Մենք պայմանավորվել ենք շարունակելու համագործակցությունը ԴԱԻՇ-ի և Ալ-Քաիդայի և ՄԱԿ-ի Անվտանգության խորհրդի կողմից այդպիսին ճանաչված այլ ահաբեկչական խմբավորումների հետ կապված բոլոր անհատների, խմբերի, ձեռնարկությունների և կազմակերպությունների վերջնական վերացման համար՝ միաժամանակ ապահովելով խաղաղ բնակչության և քաղաքացիական ենթակառուցվածքների պաշտպանությունը՝ միջազգային մարդասիրական օրենսդրությանը համապատասխան»,- ասված է հայտարարության մեջ:
Կողմերը նաև լուրջ մտահոգություն են հայտնել Հեյաթ Թահրիր Ալ-Շամ խմբավորման և դրան հարակից այլ ահաբեկչական կազմակերպությունների ներկայության և ահաբեկչական գործունեության վերաբերյալ, որոնք սպառնում են խաղաղ բնակիչներին:
Ռուսաստանի Դաշնությունը, Իրանը և Թուրքիան դատապարտում են Իսրայելի ռազմական հարձակումները Սիրիայում, դա միջազգային իրավունքի խախտում է և պետք է դադարեցվի, ասվում է Աստանայի ձևաչափով Սիրիայի վերաբերյալ 16-րդ միջազգային հանդիպման արդյունքներից հետո այդ երկրների ներկայացուցիչների համատեղ հայտարարության մեջ:
«Մենք դատապարտեցինք Սիրիայում շարունակվող իսրայելական ռազմական հարձակումները, որոնք խախտում են միջազգային իրավունքը, միջազգային հումանիտար իրավունքը, Սիրիայի և հարևան երկրների ինքնիշխանությունը, սպառնում են տարածաշրջանում կայունությանը և անվտանգությանը, և կոչ արեցինք դադարեցնել դրանք»,- ասված է Նուր-Սուլթանում ստորագրված հայտարարության մեջ:
