Վերաքննիչ քրեական դատարանի նախագահ է ընտրվել դատավոր Տիգրան Սահակյանը

Վերաքննիչ քրեական դատարանի նախագահ է ընտրվել դատավոր Տիգրան Սահակյանը; Այս մասին «Փաստինֆո»-ի հետ զրույցում հայտնեց ԲԴԽ անդամ Գրիգոր Բեքմեզյանը:

Հիշեցնենք, որ Վերաքննիչ քրեական դատարանի նախագահ Վազգեն Ռշտունու պաշտոնավարման ժամկետը լրացել է հուլիսի 4-ին: Մամուլում շրջանառվող տեղեկությունների համաձայն՝ Վերաքննիչ քրեական դատարանի նախագահի պաշտոնում դատավորները ցանկանում են տեսնել հեղինակություն վայելող, բարձր վարկանիշ ունեցող և անաչառ դատավոր Մխիթար Պապոյանին, մինչդեռ դա ԲԴԽ նախագահի պաշտոնակատար Գագիկ Ջհանգիրյանի սրտով չէր, քանի որ համակարգում հեղինակություն վայելող դատավոր Մխիթար Պապոյանը որևէ կերպ չէր համաձայնի գործարքի գնալ Ջհանգիրյանի հետ, քաղաքական հնչեղություն ունեցող գործերով իշխանահաճո որոշումներ չէր կայացնի: Ըստ մամուլում շրջանառվող տեղեկությունների՝ քննարկվում էին նաև դատավոր Սևակ Համբարձումյանի և Տիգրան Սահակյանի թեկնածությունմերի։ Վերջինս, ի դեպ, նախկինում արդեն զբաղեցրել է դատարանի նախագահի պաշտոնը և համարվում է դատախազության կամքը դատող դատավորներից մեկը:

Ավելին՝ նա բավականին մոտ հարաբերություններ ունի նաև ՀՀ նախկին զինդատախազ, այժմ՝ ԲԴԽ նախագահի ժամանակավոր պաշտոնակատար Գագիկ Ջհանգիրյանի հետ: Ի դեպ, շրջանառվել է նաև դատավոր Արմեն Դանիելյանի անունը, որի նշանակմանը Վերաքննիչ քրեական դատարանի նախագահի պաշտոնում, դեմ էին հենց ԲԴԽ անդամները, թեև Արմեն Դանիելյանը համարվում է թերևս «ամենաիշխանահաճո» դատավորներից մեկը:

ԲԴԽ անդամ Գրիգոր Բեքմեզյանը «Փաստինֆո»-ի հետ զրույցում հայտնեց, որ ԲԴԽ-ն այսօր է ընտրել Տիգրան Սահակյանին՝ որպես Վերաքննիչ քրեական դատարանի նախագահ: Հարցին՝ արդյոք ԲԴԽ բոլոր անդամներն են կողմ եղել, որ դատավոր Տիգրան Սահակյանը նշանակվի Վերաքննիչ քրեական դատարանի նախագահի պաշտոնում՝ Բեքմեզյանը նշեց, որ նման տեղեկություն տրամադրելու իրավունք չունի:

Ինչ վերաբերում է Վերաքննիչ քրեական դատարանի նախագահի պաշտոնի համար թեկնածուների շրջանառվող անուններին, ապա, ըստ նրա, Վերաքննիչ քրեական դատարանի բոլոր դատավորներն էլ, բացառությամբ նրանց որոնք չունեն 3 տարվա ստաժ կամ ունեն կարգապահական տույժ, թեկնածուներ էին։