Օքսֆորդի համալսարանի մասնագետները պարզել են, որ կորոնավիրուսի դեմ Pfizer/BioNTech-ի և AstraZeneca-ի երկու դեղաչափով պատվաստումը խառը իրականացնելու սխեման արդյունավետ է ցանկացած համադրությամբ: Այս մասին հայտնում է Корреспондент պարբերականը՝ հղում անելով Reuters-ին:
Փորձին մասնակցել է 50 տարեկան և բարձր տարիքի 830 մարդ: Արդյունքները ցույց են տալիս, որ տարբեր պատվաստանյութերի երկու դեղաչափերի կիրառումը չորս շաբաթ ընդմիջումով «կորոնավիրուսի դեմ ուժեղ իմունային արձագանք է առաջացրել»:
Հետազոտողները հստակեցնում են, որ հակամարմինների ամենաբարձր արձագանքը նկատվել է այն մարդկանց մոտ, ովքեր ստացել են Pfizer/BioNTech ընկերության պատվաստանյութի երկու դեղաչափ: Միևնույն ժամանակ պատվաստման բոլոր խառը սխեմաները ավելի լավ արձագանք են առաջացրել, քան AstraZeneca ընկերության պատվաստանյութի երկու դեղաչափերը: Բացի այդ, AstraZeneca-ի առաջին ներարկումից հետո Pfizer/BioNTech-ի ներարկումը նույնպես ավելի մեծ ազդեցություն է ունեցել, քան AstraZeneca-ի երկրորդ դեղաչափի ներարկումը:
Եվ վերջապես, AstraZeneca-ից հետո Pfizer/BioNTech-ով պատվաստումը առաջացրել է հակամարմինների ավելի բարձր արձագանք, քան հակառակ հաջորդականությամբ պատվաստումը:
Նշվում է, որ այժմ գիտնականները սպասում են նշված երկու պատվաստանյութերը 12 շաբաթվա տարբերությամբ ներարկելու ուսումնասիրությունների արդյունքներին: