Ամերիկացի գիտնականները պարզել են, որ մեծ քանակությամբ տապակած կերակուրների և քաղցր ըմպելիքների կանոնավոր օգտագործումը մեծացնում է սրտանոթային հիվանդություններից մահվան հավանականությունը: Հեղինակները որպես առողջ այլընտրանք առաջարկում են միջերկրածովյան դիետան: Հետազոտության արդյունքները հրապարակված են JAHA: Journal of the American Heart Association- ում:
Վերլուծությունը հիմնված էր REGARDS ուսումնասիրության տվյալների վրա. տվյալներն արտացոլում են կյանքի տարբեր գործոնների կապը ինսուլտի ռիսկի հետ: Հետազոտությունն անցկացվել է ԱՄՆ-ում 2003-2007 թվականներին, որին մասնակցել են 45 տարեկան և բարձր տարիքի մարդիկ:
«Թեպետ այդ ուսումնասիրությունը դիտողական բնույթ է ունեցել, բայց արդյունքները վկայում են, որ դիետան կարող է փոփոխվող ռիսկի գործոն լինել հանկարծակի մահվան համար, և հետևաբար, դիետան ռիսկի գործոն է, որի վրա մենք որոշակի վերահսկողություն ունենք», – ասել է հոդվածի առաջին հեղինակ պրոֆեսոր Ջեյմս Շիկանին։
Նմուշում հեղինակները ներառել են 21 հազար մարդու, որոնք ունեցել են սրտի իշեմիկ հիվանդություն: Մոտ մեկ տասնամյակ գիտնականները ստուգել են մասնակիցների առողջությունը և օգտագործել հարցաթերթիկներ`գնահատելու համար 110 հատ նշված մթերքներիցինչ քանակությամբ են օգտագործել: Այս ընթացքում սրտի պատճառով հանկարծակի մահացել է ավելի քան 400 մասնակից:
Հարցաթերթիկները վերլուծելուց հետո գիտնականները հայտնաբերել են սնվելու հինգ մոդել. 1) «հարավային» ոճ՝ շատ տապակած կերակուրներով, ձվերով, ճարպերով, մսամթերքով և շաքարով քաղցր ըմպելիքներով. 2) «քաղցր» դիետա, որը ներառում է աղանդեր, շոկոլադներ, կոնֆետներ և նախաճաշին քաղցր մթերքներ. 3) «հարմար» սննդի ռեժիմ, որը հիմնված է հեշտությամբ պատրաստվող կերակուրների վրա, ինչպիսիք են մակարոնեղենային ուտեստները կամ պիցցան, մեքսիկական և չինական սնունդը 4) «բուսական» դիետա, որը հարուստ է բանջարեղենով, մրգերով, մրգահյութերով, հացահատիկային մշակաբույսերով, լոբով, ձկներով, թռչնամսով և յոգուրտով, և 5) «ալկոհոլային և աղցանային» դիետա, որը ներառում է գարեջուրը, գինի, լիկյոր՝ խոտաբույսերի, լոլիկի, սոուսով աղցանների հետ:
Սրտանոթային համակարգի համար առավել վնասակար է սնվելու «հարավային» ոճը. այն կապված է հանկարծակի մահվան առավելագույն քանակի հետ, իսկ նվազագույնը վտանգը «բուսական» տարբերակի դեպքում է, որը հնարավորինս մոտ է հայտնի միջերկրածովյան դիետային, որը հարուստ է մրգերով, բանջարեղենով, ձկներով, ամբողջական ձավարեղենով և լոբազգիներով և պարունակում է շատ քիչ միս և կաթնամթերք:
Ընդհանուր առմամբ, «հարավային» ոճի սննդակարգով մասնակիցների մոտ սրտի պատճառով հանկարծակի մահվան ռիսկը 46 տոկոսով բարձր է խմբի միջին ցոսւցանիշից, իսկ նրանց, ովքեր հետևել են ավանդական միջերկրածովյան դիետային, 26 տոկոսով ավելի ցածր ռիսկ է եղել:
Հետևաբար, հեղինակները եզրակացնում են, որ մրգերով, բանջարեղենով, ամբողջական հացահատիկով և ձկներով հարուստ սննդամթերքի անցնելը կարող է էապես նվազեցնել սրտի հետ կապված հանկարծակի մահվան հավանականությունը:
