«Ուղիղ գիծ Վլադիմիր Պուտինի հետ» ամենամյա հեռուստակամուրջի ընթացքում ՌԴ նախագահն ասել է, որ Ռուսաստանը հստակ դեր է խաղացել Լեռնային Ղարաբաղի լուրջ ճգնաժամի կարգավորման հարցում:
«Ոչ ոքի շահերից չէր բխում, որ դա (պատերազմը – խմբ.) տեղի ունենար՝ ոչ՛ Ադրբեջանի, ո՛չ Հայաստանի, ո՛չ առավել ևս Լեռնային Ղարաբաղի բնակիչների, որովհետև հարցի մյուս կողմն այն է, որ եթե մենք բոլորս ապրենք խաղաղ և համերաշխ, ապա կստեղծենք պայմաններ մարդկանց կյանքի բարելավման համար ոչ միայն անվտանգության ոլորտում, այլ նաև առկա պայմաններում՝ նկատի ունենալով ընտանիքների նորմալ գոյատևումը, նկատի ունենալով տնտեսական զարգացումը, սոցիալական զարգացումը, որի կարիքն, անշուշտ, մեծապես ունեն ԼՂ-ում ապրող մարդիկ: Հնարավոր չէ մշտապես ապրել այն անհանգստությամբ, որ ամեն վայրկյան կարող է վերսկսվել զինված հակամարտությունը: Մենք դա շատ լավ հասկանում ենք: Դա հասկանում է նաև ինչպես Հայաստանի, այնպես էլ Ադրբեջանի ղեկավարությունը»,- ասել է ՌԴ նախագահը:
Բացի Լեռնային Ղարաբաղում կուտակված խնդիրներից, Վլադիմիր Պուտինը նաև մատնանշել է Հայաստանի և Ադրբեջանի պետական սահմանին տիրող խնդիրները:
«Կան նորմալ ենթակառուցվածքների վերականգնման հետ կապված հարցեր, հարցեր՝ կապված սահմանազատման հետ, որպեսզի իրականացվի համապատասխան աշխատանք Հայաստանի և Ադրբեջանի միջև պետական սահմանին, հատկապես այնտեղ, որտեղ, ըստ էության, պետական սահման երբեք չի եղել: Դա եղել է միայն վարչական սահման խորհրդային պետությունների միջև: Մենք այժմ իրականացնում ենք այս գործընթացը, ստեղծել ենք հատուկ եռակողմ խումբ՝ Ռուսաստանի, Ադրբեջանի և Հայաստանի միջև, և կանենք ամեն ինչ, որպեսզի տարածաշրջանում վերականգնենք նորմալ հարաբերությունները և այդ աշխատանքից շահողները պետք է, անշուշտ, լինեն Լեռնային Ղարաբաղի բնակիչները: Ուզում եմ մտածել, որ այդպես էլ կլինի՝ չնայած այն դժվարություններին, որ կուտակվել են տասնամյակներ շարունակ»,- եզրափակել է Պուտինը: