Ադրբեջանական APA լրատվական գործակալությանը տված հարցազրույցի ժամանակ Նյու Յորքում գտնվող Կոլումբիայի համալսարանի՝ Կովկասի հարցերով վերլուծաբան Լինկոլն Միտչելը հայտարարել է, որ ԱՄՆ-ը և Ռուսաստանը մրցակցում են Հարավային Կովկասում իրենց ազդեցությունը տարածելու հարցում, ինչի համար էլ ցածր է տարածաշրջանում երկու երկրների համագործակցության պոտենցիալը.
«Ենթադրում եմ, որ Աբխազիայի, Հարավային Օսիայի ու Վրաստանի հետ կապված ռուս-ամերիկյան տարաձայնությունները կշարունակվեն։ Խնդիրն այն է, թե որքանով այդ իրավիճակը կխանգարի ռուս-ամերիկյան երկկողմ հարաբերություններին։ Իմ կարծիքով՝ այդ տարաձայնությունները մեծ խնդիրներ չեն ստեղծի։
Ներկայումս տարածաշրջանն ավելի կայուն է, քան 2008 թվականի ռուս-վրացական օգոստոսյան պատերազմից հետո։ 2008 թվականի վերջից տարածաշրջանում աննշան փոփոխություններ են տեղի ունեցել։ Ռուսաստանն ու Վրաստանը բավական նպատակամղված չեն տարածաշրջանն ապակայունացնելու համար։
Ռուսաստանը 2008 թվականի պատերազմից ստացավ այն, ինչ ցանկանում էր, իսկ Վրաստանի ղեկավարությունն էլ հասկանում է, որ հերթական պատերազմի արդյունքները կարող են ավելի կործանարար լինել։
Տարածաշրջանի կայունության խաթարումը հնարավոր է մի շարք պատճառներով։ Տնտեսական խնդիրները կարող են թուլացնել տարածաշրջանային իշխանություններին։ Թույլ տնտեսությունը կարող է ուժեղացնել ազգայնականությունն ու անկայունությունը։ Սակայն, հազիվ թե դա տեղի ունենա մոտ ժամանակներս»։