Մարին լե Պենի «Ազգային միավորում» ծայրահեղ աջ կուսակցությունն անհաջողություն Է ունեցել Ֆրանսիայի տարածաշրջանային ընտրություններում: Այդ մասին վկայում են նախնական տվյալները, որոնք հրապարակվել են ֆրանսիական ԶԼՄ-ների կողմից:
Ընտրություններից առաջ փորձագետները «Ազգային միավորման» հաղթանակը կանխատեսել Էին 13 տարածաշրջաններից առնվազն երկուսում, բայց, առաջին փուլի արդյունքներով, կուսակցությունն իրապես հաղթանակի Էր հավակնում միայն դրանցից մեկում՝ Պրովանս-Ալպեր-Լազուր ափում: Երկրորդ փուլում, որը տեղի Է ունեցել հունիսի 27-ին, ծայրահեղ աջերը չեն կարողացել հաղթանակ տանել նաեւ այս տարածաշրջանում:
Դիտորդները կարծում են, որ նման արդյունքների պատճառներից մեկը չափազանց ցածր մասնակցությունն Էր. կորոնավիրուսի համավարակի եւ լավ ամառային եղանակի պայմաններում տարածաշրջաններում 2021 թվականի ընտրությունները քաղաքացիների մոտ սովորականից պակաս հետաքրքրություն են առաջացրել:
Տարածաշրջանային ընտրություններում եւս մեկ տանուլ տված խոշոր կուսակցություն Է Ֆրանսիայի նախագահ Էմանուել Մակրոնի «Առաջ, Հանրապետություն»-ը: Դրա ներկայացուցիչները, առաջին փուլի արդյունքներով, հաղթանակի շանսերից զրկվել են բոլոր տարածաշրջաններում: Ինչպես եւ ծայրահեղ աջերի դեպքում, Մակրոնի կուսակցությունն անհաջողություն Է ունեցել, որովհետեւ նրա ընտրազանգվածը հետաքրքրություններ չի դրսեւորել տարածաշրջանային ընտրություններում:
Երկրորդ փուլի արդյունքում ֆրանսիացիները նախապատվությունը տվել են ձախ եւ աջ ուղղության ավելի «ավանդական» կուսակցություններին: Այսպես, տարբեր աջ կոալիցիաներ (առանց «Ազգային միավորման») ստացել են Ֆրանսիայի մայրցամաքային մասի յոթ տարածաշրջանների նկատմամբ հսկողություն, ձախ կոալիցիաները՝ հինգի նկատմամբ: Եվս մեկ տարածաշրջանում՝ Կորսիկայում, ավանդաբար հաղթանակ են տանում տեղի ազգայնականները:
Այդուհանդերձ, ինչպես նշում Է BFM TV հեռուստաալիքը, նման արդյունքները հազիվ թե արտացոլեն ֆրանսիական քաղաքականության մեջ ուժերի իրական դասավորությունը 2022 թվականի նախագահական ընտրությունների նախաշեմին:
Ipsos եւ Sopra Steria ընկերությունների հարցման համաձայն, որն անցկացվել Է տարածաշրջանային ընտրությունների երկրորդ փուլից առաջ, Մակրոնը եւ լե Պենը առաջվա պես պետության ղեկավարի ընտրությունների ֆավորիտներն են:
Հարցման համաձայն, եթե նախագահի ընտրությունները կայանային հիմա, Մարին լե Պենը եւ Մակրոնը առաջին փուլում կստանային ձայների 24-ական տոկոսը եւ կանցնեին երկրորդ փուլ: Երրորդը եզրագիծը կհատեր աջ ուղղության քաղաքական գործիչ Կսավիե Բերտրանը (18 տոկոս), հաղորդել Է «Ինտերֆաքս»-ը: