Աֆրիկյան Մալիում ֆրանսիական զորքերը հարձակման են ենթարկվել զինյալների կողմից: Վեց զինվոր և չորս քաղաքացիական անձ, այդ թվում՝ երեխա, վիրավորվել են, հայտնում է ТАСС-ը՝ հղում կատարելով Ֆրանսիայի գլխավոր շտաբի հունիսի 22-ի տվյալներին:
Դեպքը տեղի է ունեցել նախորդ օրը՝ վաղ առավոտյան, Գրոսիի առաջնային օպերատիվ բազայի հարևանությամբ: Մահապարտ ահաբեկիչներով մեքենան հարձակվել է «Բարխան» գործողության մեքենայի վրա, որն այդ ժամանակ անվտանգության ապահովման հետախուզական առաքելություն իրականացնելիս է եղել:
Պարզաբանվում է, որ զինվորականներն ու Մալիի քաղաքացիները վիրավորվել են, երբ ահաբեկիչների մեքենան պայթել է ֆրանսիական զրահափոխադրիչի կողքին:
Գրոսիի շրջանում կա «Բարխան» գործողության ուժերի մեծ հենակետ, որտեղից հակաահաբեկչական գործողություններ են իրականացվում մինչև Բուրկինա Ֆասոյի սահմանը:
2014-ի օգոստոսին Ֆրանսիան սկսել է «Բարխան» գործողությունը՝ պայքարելու իսլամիստական խմբավորումների դեմ Մալիում, Բուրկինա Ֆասոյում, Մավրիտանիայում, Նիգերում և Չադում: Դա «Սերվալ» գործողության շարունակությունն էր, որը ֆրանսիացի զինվորականներն իրականացրել էին 2013-2014 թվականներին Մալիում: Ընդհանուր առմամբ՝ ընթացիկ արշավում ներգրավված է ավելի քան 5 հազար մարդ:
Ֆրանսիայի նախագահ Էմանուել Մակրոնը հայտարարել էր, որ Փարիզը ավարտում է «Բարխան» ռազմական գործողությունը Սահելում, և նրան կփոխարինի միջազգային հակաահաբեկչական դաշինքը:
