Իրանի հարավում գտնվող Հորմոզգան նահանգում մեկնարկել է «Սիրիկ» ջերմային էլեկտրակայանի (ՋԷԿ) ստեղծման նախագծի իրականացումը։ ТАСС գործակալության փոխանցմամբ՝ այս մասին հայտարարել է Իրանի նախագահ Հասան Ռոհանին: Արարողությունը հեռարձակել է Իրանի պետական հեռուստատեսությունը:
«Մենք սկսում ենք «Սիրիկ» ՋԷԿ-ի նախագծի իրագործումը»,- ասել է նախագահը:
Հունիսի 9-ին Իրանի Իսլամական Հանրապետության էներգետիկայի նախարար Ռեզա Արդաքանյանը հայտարարել էր, որ շուտով օբյեկտում աշխատանքները կմեկնարկեն և նշել էր, որ ՋԷԿ-ի հզորությունը կկազմի 1400 մեգավատ:
«Էլեկտրակայանը կապահովի էլեկտրական ցանցերի կայուն աշխատանքը Իրանի հարավում և հարավ-արևելքում»,- հավելել էր Արդաքանյանը:
Ռոհանին նաև նշել է, որ Ռուսաստանը Իրանի համար շատ կարևոր հարևան է, և երկկողմ համագործակցությունը շահավետ է երկու երկրների, տարածաշրջանի և աշխարհի համար։ Իրանի նախագահը շեշտել է Իրանի և Ռուսաստանի համագործակցության կարևորությունը Սիրիայի, Ադրբեջանի, Կովկասի և Եվրասիական տնտեսական միության հարցով։
2020-ի հոկտեմբերի 31-ին «Սիրիկ» ՋԷԿ-ի ծրագրի ղեկավար Բեհնամ Հաեֆինեժադը հայտարարել էր, որ իրանական կողմը պայմանավորվածություն է ձեռք բերել ռուսաստանյան նոր կապալառուի հետ Հորմոզգանում էլեկտրակայան կառուցելու վերաբերյալ: Նա ասել էր, որ «շուտով կսկսվի այս նախագծի իրականացումը ռուսական պետական վարկի ներգրավմամբ»: Հաեֆինեժադը հավելել էր, որ «այս նախագծի համար պահանջվող վարկի գումարը 1,4 միլիարդ եվրո է»:
«Սիրիկ» ՋԷԿ-ի շինհրապարակի բացման արարողությունը տեղի է ունեցել 2017-ի փետրվարին՝ ՌԴ էներգետիկայի նախարար Ալեքսանդր Նովակի ներկայությամբ: Նախագծի իրականացման մասին համաձայնությունը ձեռք էր բերվել Ռուսաստանի և Իրանի նախագահներ Վլադիմիր Պուտինի և Հասան Ռոհանիի միջև՝ 2015-ի նոյեմբերին Թեհրանում կայացած բանակցությունների արդյունքում:
