Օգոստոսի 9-ի երեկոյան Կարապի լճի հարակից տարածքից ոստիկանության կենտրոնի բաժին բերման են ենթարկվել Հայ ազգային կոնգրեսի յոթ երիտասարդ ակտիվիստներ` Սահակ Մուրադյանը, Արեգ Գևորգյանը, Արտակ Կարապետյանը, Տիգրան Առաքելյանը, Դավիթ Քիրամիջյանը, Վահագն Գևորգյանը և Սարգիս Գևորգյանը: Արդեն այսօր` օգոստոսի 10-ին, հայտնի դարձավ, որ նրանց նկատմամբ քրեական գործ է հարուցվել:
Բերման ենթարկվելուց առաջ և հետո երիտասարդները ոստիկանների կողմից ենթարկվել են բռնությունների ու ծեծի, ինչի հետևանքով ստացել են մարմնական վնասվածքներ: Ոստիկանության շենքում բռնության է ենթարկվել անգամ երիտասարդների փաստաբաններից մեկը:
Կեղծված ընտրությունների արդյունքում իշխանությունը զավթած խմբավորումը երկիրն, ըստ էության, վերածել է ոստիկանական պետության: Օրենքը չի գործում: Ոչ ոք պաշտպանված չէ: Իսկ նրանք, ովքեր փորձում են պաշտպանել իրենց, առավել ևս, այլոց իրավունքները, հայտնվում են թիրախի կարգավիճակում: Սա է պատճառը, որ այս երիտասարդները այդքան հաճախ ոստիկանների կողմից բռնությունների են ենթարկվում, ձերբակալվում ու կալանավորվում են:
Մենք` իրավապաշտպան կազմակերպությունների ներկայացուցիչներս, դատապարտում ենք Կոնգրեսի երիտասարդ յոթ ակտիվիստների նկատմամբ ոստիկանների կողմից իրականացված բռնությունը և նրանց նկատմամբ շինծու քրեական հետապնդում սկսելու փորձերը:
Պահանջում ենք անհապաղ ազատ արձակել բոլորին և անաչառ հետաքննության արդյունքում պատժել բռնություն գործադրողներին ու շինծու քրեական գործ սարքողներին:
Իրավունքի և ազատության կենտրոն հ/կ
Վարդան Հարությունյան
Երիտասարդություն հանուն ժողովրդավարության հ/կ
Իզաբելլա Սարգսյան
Հելսինկյան Քաղաքացիական ասամբլեայի հայկական կոմիտե հ/կ
Նատալյա Մարտիրոսյան
Ժուռնալիստների «Ասպարեզ» ակումբ հ/կ
Լևոն Բարսեղյան
Հելսինկյան քաղաքացիական ասամբլեայի Վանաձորի գրասենյակ հ/կ
Արթուր Սաքունց
Հույս հ/կ
