Կրեմլում ցավում են, որ Միացյալ Նահանգները որոշել է վերջնականապես դուրս գալ «Բաց երկնքի մասին» պայմանագրից:
«Պայմանագիրը մնում է: Ճիշտ է, առանց ԱՄՆ-ի և Ռուսաստանի այն շատ հարցերում կկորցնի իր կենսունակությունը»,- լրագրողների հետ զրույցում ասել է ՌԴ նախագահի մամուլի խոսնակ Դմիտրի Պեսկովը:
Ավելի վաղ Վաշինգտոնը հայտարարել էր, որ միանշանակ լքում է պայմանագիրը և կրկին հիշատակել էին «ռուսական խախտումները»:
«Բաց երկնքի մասին» պայմանագիրն ուժի մեջ էր մտել 2002 թվականի հունվարի 1-ին և դարձել Սառը պատերազմից հետո Եվրոպայում վստահության մթնոլորտի ամրապնդման միջոցներից մեկը: Այն 34 անդամ երկրներին թույլ էր տվել բաց տեղեկություն ստանալ միմյանց միջոցառումների և զինված ուժերի մասին:
Հիշեցնենք, որ նոյեմբերի 22-ից ԱՄՆ-ն պաշտոնապես դուրս է եկել «Բաց երկնքի մասին» պայմանագրից, որը մասնակից երկրներին թույլ է տալիս հետախուզական թռիչքներ իրականացնել միմյանց օդային տարածքում՝ փոխադարձ համաձայնությամբ և որոշակի ժամանակացույցով: Փաստաթուղթը համարվում է Ատլանտիկայի երկու կողմերում վստահության և անվտանգության ամրապնդման գլխավոր գործիքներից մեկը։
