Գերմանիայի կանցլեր Անգելա Մերկելը համարում է, որ Ryanair ավիաընկերության ինքնաթիռի հարկադիր վայրէջքի և ընդդիմադիր լրագրող Ռոման Պրոտասևիչի ձերբակալման գործում Ռուսաստանի դերը պարզ չէ։ Այս մասին հաղորդում է Корресондент պարբերականը։
«Լավ հայտնի է, որ Բելառուսը և Ռուսաստանը սերտ հարաբերություններ ունեն»,-ասել է Մերկելը ԵՄ գագաթնաժողովի արդյունքներով մամուլի ասուլիսի ժամանակ։
Որպես Մոսկվայի հավանական միջամտությունը հաստատող օրինակ՝ Մերկելը նշել է այն փաստը, որ ինքնաթիռի ուղևորներից մի քանիսը միջադեպից հետո չեն մեկնել Վիլնյուս։ Այս մասին հայտնել է AFP գործակալությունը:
Այնուամենայնիվ, կանցլերի խոսքով, գագաթնաժողովի մասնակիցները «հավաստի տեղեկություններ չունեին Ռուսաստանի դերի մասին», ուստի նա մտադիր է այդ հարցն ուղղել ՌԴ նախագահ Վլադիմիր Պուտինին իրենց հաջորդ զրույցի ընթացքում:
Գերմանիայի կանցլերը բելառուսական վարչակարգի գործողություններն անվանել է աննախադեպ և անընդունելի, մտահոգություն է հայտնել Ռոման Պրոտասևիչի վիճակի համար: Պաշտոնական Մինսկի կողմից հրապարակված կարճ տեսանյութը, որում ձերբակալված բլոգերը հայտարարում է, որ խոստովանական ցուցմունք է տալիս և իր հետ վարվում են օրենքին համապատասխան, Մերկելը որակել է որպես «անհանգստացնող և ցնցող»:
«Դա ավելի հրատապ է դարձնում նրա ազատելու մեր պահանջը։ Եվ դրա համար մենք կօգտագործենք մեզ հասանելի բոլոր ալիքները», – հայտարարել է Գերմանիայի կառավարության ղեկավարը:
Հիշեցնենք, որ մայիսի 23-ին Բելառուսի օդային տարածքով Աթենքից Վիլնյուս թռչող Ryanair-ի ինքնաթիռը հարկադիր վայրէջք էր կատարել Մինսկի օդանավակայանում՝ ռումբի տեղակայման մասին տեղեկությունների պատճառով։ Ինքնաթիռում գտնվող ընդդիմադիր լրագրող, Բելառուսում ծայրահեղական ճանաչված NEXTA Telegram ալիքի նախկին խմբագիր Ռոման Պրոտասևիչը և նրա ընկերուհին՝ Ռուսաստանի Դաշնության քաղաքացի Սոֆյա Սապեգան, ձերբակալվել էին:
