News Georgia-ի փոխանցմամբ՝ Վրաստանի խորհրդարանի խոսնակ Դավիթ Բաքրաձեն Facebook-ի ամենաակտիվ վրացի քաղաքական գործիչն է՝ թեև ամենաշատ «ընկերներն» ունի Թբիլիսիի քաղաքապետ Գիգի Ուգուլավան։
Սոցիալական ցանցերում քաղաքական գործիչների ակտիվությունը դիտարկել է վրացական «Ռեզոնանսի» թերթը։ Համապատասխան հոդվածի հեղինակը նշում է, որ վերջին շրջանում վրացի քաղաքական գործիչները, ընդ որում՝ թե՛ իշխանության, թե՛ ընդդիմության ներկայացուցիչները, ակտիվացել են Facebook-ում։ Նրանց էջերը սիստեմատիկորեն թարմացվում են. դրանցում տեղադրվում է իշխանական այս կամ այն մարմնի, կուսակցությունների գործունեության մասին տեղեկատվություն։
Օրինակ՝ հուլիսի 8-ին Բաքրաձեն իր էջում տեղադրել է հետևյալը. «Շնորհակալ եմ ընկերներիս՝ աջակցության ու բարեմաղթանքների համար։ Հաղորդակցության ակտիվացման նպատակով առաջարկում եմ հետևյալը. երբ Facebook-ում իմ ընկերների թիվը կհասնի 10.000-ի, ես պատահական ընտրության մեթոդով նրանցից կընտրեմ 10-ին, որոնց կհրավիրենք խորհրդարան, ծանուցողական շրջագայություն կկազմակերպենք, ապա նաև կճաշենք միասին։ Ձեզ համար ընդունելի՞ է այս գաղափարը»։
Ներկայումս այս գաղափարը հավանության է արժանացել 500 «ֆեյսբուքցու» կողմից։ Թերթի տվյալներով՝ դրա շնորհիվ Բաքրաձեի ընկերների թիվը շուտով հասել է 12.000-ի։ Արդյունքում՝ Բաքրաձեն, ինչպես և խոստացել էր, արդեն իսկ ընտրել է 10 հոգու, որոնք շուտով կայցելեն խորհրդարան։
Ուգուլավան Facebook-ում ունի 40.000 «ընկեր», իսկ Վրաստանի նախագահ Միխեիլ Սաակաշվիլին՝ 30.000 «ընկեր»։
Հիշեցնենք, որ Բաքրաձեն Վրաստանի խորհրդարանի խոսնակ է դարձել 2008 թվականի հունիսի 7-ին։
