Դեռևս Արցախի 44-օրյա պատերազմի ընթացքում Իրանը հայտարարել էր, որ Հայաստանի պետական սահման կարմիր գիծ է Թեհրանի համար: Այսօր արդեն Ադրբեջանը բացահայտ սադրանքի է դիմում ՀՀ պետական սահմանների ուղղությամբ: Իրանն իր Արտաքին գործերի նախարարության շուրթերից հայտարարել է, որ Սյունիքի մարզը և Զանգեզուրի միջանցքը կարմիր գծերն են համարվում, և Իրանը թույլ չի տա որևէ փոփոխություն սահմանային գծերում: Համանման հայտարարությամբ հանդես է եկել նաև Իրանի խորհրդարանի ազգային անվտանգության ու արտաքին քաղաքականության հանձնաժողովի նախագահը: Այս և տարածաշրջանային կարևորության մի շարք հարցեր «Առաջին լրատվական»-ը քննարկել է իրանահայ լրագրող Ռուբիկ Ղահրաման Մոնասյանի հետ:
Մեր զրուցակցի դիտարկմամբ՝ գեոպոլիտիկ իմաստով Հայաստանի դերը Իրանի համար քննարկման առարկա չէ. Հայաստանը միակ հարևանն է, որի հետ Իրանը խնդիրներ չունի: «Պարզ իրողություններ են, որոնք քննարկման ենթակա չեն, մենք խնդիրները քննարկում ենք մի քայլով, մինչդեռ աշխարհի ուղեղային կենտրոնները այդպես չեն անում: Հայաստանում պետք է ավելի շատ քննարկվի՝ ինչ կարելի է առաջարկել Իրանին»,-ասաց Մոնասյանը՝ ընդգծելով, որ Սյունիքի պարագայում ունենք հայտարարություն Իրանից, որը որևէ էական նշանակություն ունենալ չի կարող: Նրա խոսքով՝ Իրանը չէր կարող հայտարարությամբ հանդես չգալ, քանի որ հարևան է, բայց որևէ քայլ, ազդակ, որը ցույց կտար, որ այն, ինչ տեղի է ունենում Սյունիքի շուրջ, կարմիր գիծ է Թեհրանի համար, չենք տեսնում: