Նախօրեին պաղեստինյան Համաս խմբավորումը հրթիռներ է արձակել Իսրայելի ուղղությամբ, որի հետևանքով կան վիրավորներ: Հրթիռներից մեկն ընկել է բնակելի թաղամասի վրա: 6 վիրավորներից երկուսի վիճակը ծանր է, մնացած 4-ը մի ընտանիքից են, այդ թվում երկու երեխաներ: Նշենք, որ իսրայելցիների և պաղեստինցիների միջև լարվածությունը կրկին սրվել է Արևելյան Երուսաղեմում հրեաների ավանդական երթի պատճառով, որն անցնում է պաղեստիցիների թաղամասերով։ Երուսաղեմում ոստիկանությունն ուժ է կիրառել պաղեստինցիների նկատմամբ, որի հետևանքով վնասվածքներ են ստացել հարյուրավոր մարդիկ։
Ի պատասխան Երուսաղեմի հրթիռակոծության, Իսրայելի օդուժը ռմբակոծել է Գազայի հատվածը, որի հետևանքով 22 մարդ է զոհվել, կան բազմաթիվ վիրավորներ:
Այս զարգացումների շուրջ «Առաջին լրատվական»-ը զրուցել է Երուսաղեմի Հայոց պատրիարքարանի դիվանապետ Հայր Կորյուն վարդապետ Բաղդասարյանի հետ:
«Այս պահի դրությամբ իրավիճակը խաղաղ է, բախումներ չկան, բայց երեկ բավականին բախումներ կային թե Շեյխ Ջարահ մզկիթի շուրջը, թե շրջապատում: Նախօրեին նշվում էր Երուսաղեմի օրը, 1967 թվականից հետո հին քաղաքի, Արևելյան Երուսաղեմի գրավումից հետո հրեաները նշում են Երուսաղեմի օրը և լարվածությունը հիմնականում դրա հետ է կապված, թեև դրան նախորդել էր դեպք, որը այդ լարվածությունը ստեղծել էր, դա թաղամասերից մեկում արաբ ընտանիքներին իրենց բնակարաններից տեղահանելու գործողությունն էր: Այդ ամենը նպաստեց, որ երեկ այդ բախումները տեղի ունենան:
Երեկ երեկոյան ժամը 6-ին հրթիռներով հարձակում տեղի ունեցավ Երուսաղեմի և շրջակա արվարձանների վրա Գազայի հատվածից, որին ի պատասխան օդային հարվածներ տեղի ունեցան Իսրայելի օդուժի կողմից: Այս պահին Երուսաղեմում խաղաղ է, կրակոցներ ու բախումներ չկան»,-ասաց Հայր Կորյունը:
Նա հավելեց, որ վիրավորներ կան թե Երուսաղեմի արվարձաններում, թե Աշկելենում, բայց ավելի շատ տուժածներ ու վիրավորներ կան Գազայի հատվածում, որտեղ 20-ից ավելի զոհեր կան և այդ թիվը դեռ վերջնական չի:
«Լարվածությունն այս պահի դրությամբ մի փոքր մեղմվել է, բայց չենք կարող կանխատեսել, թե ինչ զարգացումներ կարող են տեղի ունենալ: Լարվածություն դեռ կա, մահմեդականները դեռ Ռամադան ամսվա մեջ են, նրանք իրենց աղոթքները պետք է անեն մզկիթում ու չենք կարող ասել, թե ինչ զարգացումներ կլինեն:
Վախի կամ խուճապի մթնոլորտ չեմ կարող ասել, որ կա, բայց երեկվա հրթիռների հարվածներից հետո բնակչությանը հրահանգ տրվեց, որ բոլորը մտնեն ռմբապաստարաններ: Բավական երկար տարիներ այսպիսի հրահանգ չէր տրվել: Այդ հրթիռների ձայները չեմ ասի խուճապ, բայց մարդկանց ստիպեց, որ ավելի զգույշ լինեն, ուշադիր լինեն:
Նույնիսկ Կնեսետի աշխատանքները դադարեցվեցին և Կնեսետի անդամներին տարհանեցին շենքից: Անմիջապես զգուշության միջոցառումներ ձեռնարկվեցին»,-ասաց նա:
Հարցին, թե արդյոք այս ամենից տուժել է Երուսաղեմի հայոց պատրիարքությունը,Հայր Կորյունն արձագանքեց. «Մեր թաղից այդ դեպքերը հեռու են և մեզ հետ որևէ կապ չունեն, թեև երեկվա Երուսաղեմի օրվա հետ կապված տոնակատարությունների ու երթերի մեծ մասը տեղի էր ունենում հայկական թաղամասում»: