ՌԴ արտգործնախարար Սերգեյ Լավրովի Հայաստան այցից առաջ Բաքվից Երևան վերադարձավ երեք հայ ռազմագերի: Արդյո՞ք այդ հանգամանքը ուղիղ կապ ունի Լավրովի այցի հետ և դրանից առաջ Մոսկվան փորձում է այսպես ասած «կարկանդակի» էֆեկտ ստանալ Երևանում որոշակի հարցեր քննարկելու համար: Թե այդուհանդերձ Բաքվի վրա ազդում է միջազգային հարթակներում հայ ռազմագերիների հարցի հանդեպ ուշադրության աճն ու պահանջների բարձրաձայնումը: Բարդ է իհարկե ստույգ գնահատել պատճառները, սակայն փաստը, որ երեք հայ ռազմագերի տուն է վերադառնում Լավրովի Երևան ժամանելու նախօրեին, անշուշտ արժանի է դիտարկման:
Մյուս կողմից պետք չէ մոռանալ, որ դեռևս Բաքվի ձեռքում են մնում տասնյակ հայ ռազմագերիների , և որքան էլ ողջունելի, ուրախալի է մեր երեք տղաների վերադարձի փաստը, այդուհանդերձ այն երբեք չպետք է լինի գոհացուցիչ, քանի դեռ չեն վերադարձել բոլորը և մենք չենք եղել համոզված ու վստահ, որ Բաքվի ձեռքին չունենք պատանդներ: Իսկ մեր տղաները ակնհայտորեն պատանդ են, ոչ ռազմագերի: Նրանք պատանդ են մեծ քաղաքականությանը, որ ծավալվում է այս ռեգիոնում և որի անմիջական դերակատարներն են Թուրքիան ու Ռուսաստանը: Կասկածից վեր է, որ Բաքուն ռազմագերիների հարցը քաղաքական նկատառումներով խաղարկում է առնվազն նրանցից մեկի «բարձր հովանու» ներքո, որովհետև Ադրբեջանը բացարձակապես ի զորու չէ առանց այդպիսի հովանու գնալ հակամարդասիրական այդպիսի արկածախնդրության: Ամբողջ հարցն այստեղ այն է, թե որքանով է այդ խաղին ներգրավված Ռուսաստանը, այսինքն որքանով են հայ պատանդները խաղաքարտ նաև Ռուսաստանի ձեռքում և Մոսկվան պարզապես չի՞ կարողանում ավելին ստանալ Բաքվից, թե՞ չի ուզում ստանալ ավելին:
Համենայնդեպս ակնառու է մի բան, որ Լավրովի այցից առաջ երեք հայ ռազմագերիների վերադարձը ոչ թե Երևանին է դնում այսպես ասած քաղաքական կամ դաշնակցային պարտքի տակ, այլ ընդամենը Ռուսաստանի՝ թե դաշնակցային պարտքի, թե նաև նոյեմբերի 9-ի եռակողմ հայտարարության ստորագրող սուբյեկտի և ըստ էության միջնորդ-պատասխանատուի պարտքի փոքր մասի վերադարձ է: Ռուսաստանը այդ համաձայնագրով դեռևս «պարտք» է Հայաստանին տասնյակ ռազմագերիների վերադարձ: Ընդ որում, խնդիրը այստեղ բացարձակապես Ռուսաստանը չէ, ինչպես կարող են «փաթեթավորել» շատերը: Եթե նոյեմբերի 9-ի համաձայնագիրը ստորագրած լիներ նաև որևէ այլ միջնորդ կողմ՝ Ռուսաստանից բացի կամ նրա փոխարեն, ապա այդ համաձայնագրի կետերի իրացման պատասխանատվությունը կլիներ նաև այդ կողմինը:
Լուսանկարը՝ Armeniasputnik-ի
