Ավելի քան 840 մարդ, ներառյալ ոստիկանության 540 աշխատակիցներ, վիրավորվել են Կոլումբիայում համազգային բողոքի ակցիաների ընթացքում, ձերբակալվել է 431 մարդ, հայտնել է երկրի պաշտպանության նախարար Դիեգո Մոլանո Ապոնտեն:
«Ցույցերի ընթացքում վիրավորվել են Ազգային ոստիկանության 540 աշխատակիցներ և 306 քաղաքացիական անձինք։ Խորին ցավակցություն ենք հայտնում կապիտան Խեսուս Ալբերտո Սոլանոյի մահվան կապակցությամբ», – հայտարարել է նախարարը ելույթի ընթացքում, որը հեռարձակվել է Ազգային ոստիկանության Facebook-ի էջում:
Մոլանոն հիշեցրել է, որ կիրակի օրվանից բանակը ժամանակավոր աջակցություն է ցուցաբերում անկարգությունների ենթարկված մի շարք քաղաքների, որպեսզի երաշխավորեն քաղաքացիների անվտանգությունը, կարևոր ապրանքների և վառելիքի մատակարարումը, ինչպես նաև պաշտպանեն տրանսպորտն ու ենթակառուցվածքները:
Նա նշել է, որ բողոքի ցույցերի օրերին իշխանությունները վանդալիզմի և այլ հանցագործությունների մասին մոտ 600 հաղորդում են ստացել քաղաքացիներից և ձերբակալել 431 մարդու: Ավերվել են, ըստ պաշտպանության նախարարության տեղեկատվության, 94 բանկ և 254 խանութ, երկու մունիցիպալ վարչակազմեր և ոստիկանության 64 բաժանմունքներ:
Կոլումբիայում հարկերի բարձրացման դեմ ցույցերը շարունակվում են վեցերորդ օրը, չնայած այն բանին, որ նախագահ Իվան Դուկեն արդեն հետ է կանչել հարկային բարեփոխման նախագիծը և հրաժարվել է բենզինի և կոմունալ ծառայությունների և եկամտահարկի բազայի ԱԱՀ-ի կիրառումն ընդլայնելու գաղափարից:
Ազգային բողոքի կոմիտեն մայիսի 5-ին հայտարարել է հաջորդ ազգային գործադուլի անցկացման մասին, առաջինը տեղի է ունեցել ապրիլի 28-ին:
