Այսօր Ռուսաստանի նախագահ Դմիտրի Մեդվեդևը հանդիպելու է Ադրբեջանի նախագահի հետ, իսկ օգոստոսի 12-13-ը Մեդվեդևը հանդիպելու է Սերժ Սարգսյանի հետ:
Եռակողմ հանդիպումները երկկողմ հանդիպումների վերածելու պատճառն, ըստ Ռազմավարական և ազգային հետազոտությունների հայկական կենտրոնի փորձագետ Էդգար Վարդանյանի, այն է, որ եռակողմ հանդիպումների ժամանակ հնարավոր չեղավ գալ միջնորդների ակնկալած համաձայնությանը:
«Սռաջին լրատվականի» հետ զրույցում Վարդանյանը նկատեց, որ Մեդվեդևի քայլը՝ իր վրա վերցնել երկկողմ հանդիպումներ անցկացնելու պարտականությունը, համաձայնեցված է մյուս համանախագահների հետ: Ըստ Վարդանյանի, նման ֆորմատ ստեղծելով՝ միջնորդները ցանկանում են կողմերի հետ առանձին-առանձին ձեռք բերել ինչ-որ համաձայնություն, որպեսզի հետագայում ավելի հեշտ լինի եռակողմ հանդիպումների ժամանակ համաձայնեցնել արդեն իսկ առանձին-առանձին ձեռք բերված համաձայնությունները:
Փորձագետը նշեց, որ դժվար է այս պահին ասել, թե քանի երկկողմ հանդիպում կլինի, սակայն ակնհայտ է, որ մինչև երկկողմ հանդիպումների ժամանակ որևէ համաձայնություն ձեռք չբերվի, եռակողմ հանդիպում առաջիկայում տեղի չի ունենա:
