2020 թվականը ստիպեց բոլորին վերագնահատել կարողությունները, դիտարկել նոր հնարավորություններ, ինչպես նաև կայուն քայլեր ձեռնարկել՝ պարենային համակարգերի անխափան աշխատանքն ապահովելու համար: Այս մասին նշվեց ՄԱԿ-ի 2021 թ Պարենային համակարգերի գագաթնաժողովի շրջանակում Երևանում անցկացվող «Ներառական արժեշղթաների միջոցով պարենային կայուն համակարգերի ստեղծում» երկխոսությունը:
«Այսօր ամբողջ աշխարհում 4 մլրդ մարդ ուղղակիորեն և անուղղակիորեն աշխատում է պարենային համակարգում, այնուամենայնիվ 690 մլն մարդ թերսնվում է: Կորոնավիրուսի համավարակի պայմաններում այս թիվը կանխատեսվում է, որ կավելանա ևս 100 մլնով: Միևնույն ժամանակ աշխարհի ծայրահեղ աղքատների 80 տոկոսը հենց ապրում է գյուղական վայրերում և զբաղվում է գյուղատնտեսությամբ: Այս ոլորտում անհրաժեշտ են կտրուկ քայլեր»,- ասաց Ազգային երկխոսության ղեկավար, ՀՀ էկոնոմիկայի նախարարի տեղակալ Արման Խոջոյանը:
Նա նկատեց, որ 2020-ը ստիպեց բոլորին վերագնահատել կարողությունները, դիտարկել նոր հնարավորություններ, ինչպես նաև կայուն քայլեր ձեռնարկել պարենային համակարգերի անխափան աշխատանքն ապահովելու համար: Խոջոյանը նշեց, որ պետք է միջոցառումներ իրականացնել առողջ սննդի հասանելիությունն ամբողջ երկրում ապահովելու համար: Նրա խոսքով՝ այս տարի պետք է կրճատել հետբերքահավաքային կորուստները, որոնք որոշ գյուղապրանքների համար հասնում են մինչև 30 տոկոսի: «Վերաօգտագործման, վերամշակման և մնացորդային կառավարման մոտեցումների միջոցով ստեղծել գյուղատնտեսական համակարգերի լավ միջավայր, ինչպես նաև ստեղծել նոր լոգիստիկ շղթաներ, ապահովել շուկաների հասանելիությունը»,- ասաց փոխնախարարն ու հայտնեց, որ քննարկումները կնպաստեն նոր գաղափարների առաջացմանը և հիմք կհանդիսանան նախագծելու կամ լրամշակելու գյուղատնտեսության ոլորտում առաջիկա գործողությունների պլանը: