Եվրոպական խորհրդարանի Renew Europe խմբակցությունը Հայոց ցեղասպանության 106-րդ տարելիցի առիթով հայտարարություն է արել՝ շեշտելով, որ այդ իրադարձությունները երբեք չպետք է մոռանալ:
Խմբակցության «Թվիթեր»-ի էջում մասնավորապես նշված է. «Այսօր մենք ոգեկոչում ենք 1915 -ին տեղի ունեցած Հայոց ցեղասպանությունը, ողբերգություն, որի ընթացքում ավելի քան 1.5 միլիոն հայեր սպանվեցին: Մենք երբեք չպետք է մոռանանք»:
Խմբակցությունը շեշտել է, որ ապաքինումը պահանջում է ճանաչում և պատասխանատվություն:
Օսմանյան կայսրության կողմից 1915 թվականին հայերի նկատմամբ իրականացված ցեղասպանությունը 20-րդ դարասկզբի մեծագույն ոճրագործությունն է: Աշխարհասփյուռ հայությունը նշում է Հայոց ցեղասպանության 106-րդ տարելիցը: Ցեղասպանությունը ճանաչել և դատապարտել է մոտ երեք տասնյակ պետություն՝ Արգենտինան, Ավստրիան, Բելգիան, Բոլիվիան, Բրազիլիան, Կանադան, Չիլին, Կիպրոսը, Չեխիայի Հանրապետությունը, Դանիան, Գերմանիան, Հունաստանը, Իտալիան, Լիտվան, Լյուքսեմբուրգը, Նիդերլանդները, Պարագվայը, Լեհաստանը, Պորտուգալիան, Ռումինիան, Ռուսաստանը, Սիրիան, Սլովակիան, Շվեդիան, Շվեյցարիան, Ուրուգվայը, Ֆրանսիան, միջազգային հեղինակավոր կազմակերպություններ:
