Վրաստանի խորհրդարանի խոսնակ Արչիլ Թալակվաձեն հայտարարել է զբաղեցրած պաշտոնը թողնելու իր որոշման մասին.
«Հաշվի առնելով այն փաստը, որ երկար բանակցություններն ավարտվեցին համաձայնագրով (ընդդիմության հետ – խմբ.), որտեղ նախագահի հետ միասին ես ներկայացնում էի «Վրացական երազանքը», կարծում եմ, որ քաղաքական գործընթացների հետագա ճիշտ վարման համար ճիշտ որոշում է թողնել խորհրդարանի խոսնակի պաշտոնը և այդ պաշտոնի համար ներկայացնել մի անձնավորության, որը կաշխատի ավելի չեզոք դիրքով: Հետևաբար, մենք խորհրդարանում ռոտացիայի մասին որոշում ենք կայացրել», – ասել է Թալակվաձեն շաբաթ օրը կայացած ճեպազրույցում:
Իշխող «Վրացական երազանք» կուսակցության նախագահ Իրակլի Կոբախիձեն ճեպազրույցում ասել է, որ Թալակվաձեն կզբաղեցնի խորհրդարանի փոխխոսնակի պաշտոնը:
«Վրացական երազանքը» օրենսդիր մարմնի նախագահի պաշտոնում առաջադրում է խորհրդարանի փոխխոսնակ Կախա Կուչավայի թեկնածությունը, ասել է Կոբախիձեն:
«Ես ուզում եմ ձեզ տեղեկացնել, որ իշխող թիմի անունից խորհրդարանի նախագահի պաշտոնում կներկայացվի Կախա Կուչավայի թեկնածությունը», – ասել է նա:
