Թուրքական Akşam թերթի փոխանցմամբ՝ Վանա լճի Աղթամար կղզու Սուրբ Խաչ եկեղեցին պատրաստվում է սեպտեմբերի 11-ին տեղի ունենալիք պատարագին։ Վերջինիս նախապատրաստման համար Վան է մեկնել Պոլսո Հայոց պատրիարքի փոխանորդ Արամ արքեպիսկոպոս Աթեշյանը։ Վանում Աթեշյանը հանդիպում է ունեցել նահանգապետ Մյունիր Քարալօղլուի հետ և քննարկել պատարագի անցկացման հարցը։
Աթեշյանը հայտարարել է, որ նախորդ տարի պատարագին մասնակցել է 7000 մարդ, և ակնկալվում է, որ այս տարի էլ կմասնակցեն հազարավոր հայեր։ Աթեշյանը նաև հույս է հայտնել, որ այս տարվա պատարագը կանցնի ավելի հանդարտ ու նորմալ մթնոլորտում։
Հիշեցնենք, որ Աղթամարի Սուրբ Խաչ եկեղեցին վերանորոգվել և որպես թանգարան բացվել է 2007 թվականին։ Սակայն դրանից միայն 3 տարի անց թուրքական իշխանություններն արտոնեցին տարեկան մեկ անգամ եկեղեցում պատարագ անցկացնել։ Սուրբ Խաչ եկեղեցում պատարագ մատուցվեց 2010 թվականի սեպտեմբերի 19-ին՝ 95-ամյա ընդմիջումից հետո։