Ադրբեջանի արտաքին գործերի նախարարությունը հայտարարել է, որ երեքշաբթի հեռուստատեսային հարցազրույցում Զանգեզուրի միջանցքի վերաբերյալ Ադրբեջանի նախագահ Իլհամ Ալիևի խոսքերը Հայաստանի տարածքային ամբողջականությանը սպառնալիք չեն:
«Ադրբեջանի նախագահը, ինչպես միշտ, բավականին հստակ և կոնկրետ արտահայտեց իր տեսակետը: Մենք կցանկանայինք հրավիրել նրանց ուշադրությունը, ովքեր ցանկանում են այլ կերպ ներկայացնել մեր պետության ղեկավարի տեսակետները. ապրիլի 20-ի հարցազրույցում Ադրբեջանի նախագահը խոսել է Ադրբեջանի դեմ ռևանշիզմի մասին, որը կարող է Հայաստանում գլուխ բարձրացնել և հնարավոր սպառնալիք դառնալ մեր տարածքային ամբողջականությանը՝ շեշտելով, որ «հնարավոր սպառնալիքի հայտնաբերման դեպքում այն կչեզոքացվի, քանի որ դա ազգային պաշտպանություն է, ազգային անվտանգության հարց», – չորեքշաբթի օրը հայտարարել է Ադրբեջանի ԱԳՆ մամուլի ծառայության ղեկավար Լեյլա Աբդուլլաևան:
Ըստ նրա, «դա չի սպառնում Հայաստանի տարածքային ամբողջականությանը, ինչպես պնդում է այդ երկրի ԱԳՆ-ն», այլ, ընդհակառակը, Բաքվի վճռականության ցուցիչն է՝ արձագանքել Հայաստանի կողմից Ադրբեջանի տարածքային ամբողջականությանը՝ Ադրբեջանի միջազգայնորեն ճանաչված սահմաններում ցանկացած սպառնալիքին:
Նա նաև նշել է, որ Բաքուն ամենաբարձր մակարդակով բազմիցս հայտարարել է Հայաստանի հետ հարաբերությունների կարգավորման պատրաստակամության մասին՝ միջազգային իրավունքի, մասնավորապես՝ երկրների ինքնիշխանության, նրանց տարածքային ամբողջականության և միջազգային սահմանների անձեռնմխելիության հիման վրա:
«Հենց սրան են ծառայում 2020 թվականի նոյեմբերի 10-ին և 2021 թվականի հունվարի 11-ին ստորագրված եռակողմ հայտարարությունները», – հավելել է Աբդուլլաևան: Բացի այդ, ԱԳՆ պաշտոնական ներկայացուցիչը նշել է, որ իր հարցազրույցում նախագահ Ալիևը նաև հայտարարել է Հայաստանի հետ համագործակցելու Ադրբեջանի պատրաստակամության մասին:
Երեքշաբթի Ալիևը հեռուստատեսային հարցազրույցում ասել էր, որ Ադրբեջանը կհասնի Զանգեզուրի միջանցքի ստեղծմանը`անկախ Հայաստանի ցանկությունից: Նա հավելել էր, որ եթե Հայաստանը դա ցանկանա, ապա հարցն ավելի հեշտ կլինի լուծել, իսկ եթե չցանկանա, ադրբեջանական կողմը պատրաստ կլինի այն լուծել ուժով:
Հայաստանի ԱԳՆ-ից պատասխանել էր՝ Հայաստանը կձեռնարկի բոլոր անհրաժեշտ միջոցները՝ իր ինքնիշխանությունը և տարածքային ամբողջականությունը պաշտպանելու համար։