Երկու մարդ է զոհվել Տեխաս նահանգում Tesla էլեկտրամոբիլի վթարի արդյունքում, որն ընթանում էր ավտոպիլոտի ռեժիմով: Այս մասին կիրակի օրը հայտնել է The Wall Street Journal-ը՝ հղում անելով Հարիս շրջանի ոստիկանությանը:
Իրավապահ մարմինների տվյալներով՝ զոհերից մեկը եղել է առջևի ուղևորի նստատեղին, մյուսը՝ հետնամասում: «Նախաքննությունը դեռ չի ավարտվել, բայց արդեն պարզ է, որ մեքենայի ղեկին ոչ ոք չի եղել: Մենք դրանում 99% -ով համոզված ենք», – մեջբերում է թերթը շրջանի ոստիկանապետ Մարկ Հերմանի խոսքերը:
Վթարը տեղի է ունեցել անցած շաբաթ օրը: Էլեկտրամոբիլը մեծ արագությամբ բախվել է ծառին և բռնկվել է Հյուսթոնից հյուսիս ընկած ճանապարհի հատվածում: Հարիս շրջանի իշխանությունները պարզաբանել են, որ կրակը մարելու համար պահանջվել է ավելի քան 121,100 լիտր ջուր և չորս ժամ:
Tesla ընկերությունը հրաժարվել է թերթին մեկնաբանություն տալ տեղի ունեցածի կապակցությամբ։
