ՆԱՏՕ-ն հայտարարել է, որ Ռուսաստանը պետք է ապահովի Ազովի ծովում ազատ մուտքը դեպի ուկրաինական նավահանգիստներ, ինչպես նաև ազատ նավարկությունը: Այս մասին հայտնում է ՌԻԱ Նովոստի-ն՝ հղում անելով դաշինքի պաշտոնական ներկայացուցիչ Օանու Լունգեսկուի Twitter-ին:
Նրա խոսքով՝ Հյուսիսատլանտյան դաշինքը մտահոգություն է հայտնում այն տեղեկատվության կապակցությամբ, որ Ռուսաստանի Դաշնությունը նախատեսում է սահմանափակել մուտքը Սև ծովի և Կերչի նեղուցի որոշ գոտիներ:
Լունգեսկուն նշել է, որ ռուսական կողմի նման գործողությունը «անխոհեմ» կլինի և կդիտվի որպես «Մոսկվայի ապակայունացնող պահվածքի մաս»:
Դաշինքի ներկայացուցիչը նշել է, որ «Ղրիմի, Սև և Ազովի ծովերի ռազմականացումը» սպառնալիք է ներկայացնում Ուկրաինայի անկախության համար, ինչպես նաև խաթարում է կայունությունը տարածաշրջանում: Բացի այդ, նա կոչ է արել Մոսկվային «վերջ տալ սադրանքներին և հարգել միջազգային պարտավորությունները»:
