Ասիական և ռուսական շուկաներում բորսայական ինդեքսների անկումն, ամենայն հավանականությամբ, պայմանավորված էր ԱՄՆ իշխանությունների վերջին որոշմամբ, այն է՝ դեֆոլտի վիճակից դուրս գալու համար ԱՄՆ պետական պարտքի շեմը բարձրացնելով: Այս կարծիքին է տնտեսագետ, ԱԺ պատգամավոր Վարդան Բոստանջյանը:
Նրա խոսքով, քանի որ ԱՄՆ պարտքի զգալի մասը բաժին է ընկնում Չինաստանին ու ասիական զարգացած երկրներին (Ճապոնիա, Հարավային Կորեա և այլն), այդ պատճառով ասիական արժեթղթերի ինդեքսները նվազել են: «Այս ամենը չէր կարող չանդրադառնալ նաև Ռուսաստանի վրա, որի արժեթղթերի գնանշումներն ավելի մեծ անկում ապրեցին: Ընդհանրապես Չինաստանի տնտեսական քաղաքականության մեջ բավական մեծ տեղ է գրավում սեփական կապիտալի տեղադրումը այլ երկրներ»,- ասաց Վ.Բոստանջյանը:
Հիշեցնենք, որ Ռուսական ֆոնդային շուկայի երկու խոշոր ինդեքսներն օգոստոսի առաջին շաբաթվա արդյունքներով իջել էին 8% և 7% տոկոսային կետով, իսկ Forbes-ը կանխատեսում է անկման շարունակություն նաև այս շաբաթ: Ասիական-խաղաղօվկիանոսային շրջանի ֆոնդային ինդեքսները այսօր ընկել են 2-4%-ով՝ դառնալով ավելի ցածր վերջին 1 տարվա նվազագույն արժեքից:
