Աֆրոամերիկացի Ջորջ Ֆլոյդի մահվան պատճառը եղել է սրտի կանգը, և ոչ թե թթվածնի պակասը: Ապրիլի 14-ին, դատական նիստի ժամանակ, նման հայտարարություն է արել պաթոլոգ-անատոմիստ Դեյվիդ Ֆաուլերը, գրում է The Guardian-ը:
Նրա խոսքով, աֆրոամերիկացու մահվան պատճառ են հանդիսացել մի շարք գործոններ, այդ թվում՝ հիվանդությունները և թմրանյութերի օգտագործումը:
Ինչպես նշել է մասնագետը, Ֆլոյդի մոտ «հանկարծակի առիթմիա է սկսվել»: Մատնանշելով գործոնները, որոնք կարող էին դրա պատճառ հանդիսանալ, փորձագետը նշել է տղամարդու սրտի հիվանդությունները, ինչպես նաև նրա բերման ենթարկման հանգամանքները: Ֆլոյդի մահվան մեջ որոշակի դեր է խաղացել նաև այն, որ տղամարդը ֆենտանիլ և մետամֆետամին պարունակող նյութեր է ընդունել: Ըստ պաթոլոգի, Ֆլոյդը շնչել է մոտակա ավտոմեքենայից արտանետվող գազերը, որը նույնպես կարող էր լինել նրա մահվան պատճառներից մեկը: