ՌԴ Դաշնության խորհրդի փոխխոսնակ Կոնստանտին Կոսաչյովը հանգիստը Թուրքիայում կազմակերպելու մտադրություն ունեցող ռուսաստանցիներին հորդորել է ցուցաբերել հայրենասիրություն և մոռանալ երկրի մասին, որի իշխանությունները Ղրիմի «բռնակցման» վերաբերյալ հայտարարություններ են անում: Այս մասին հաղորդում է «ՌԻԱ Նովոստի»-ն:
Ապրիլի 10-ին Թուրքիայի նախագահ Ռեջեփ Թայիփ Էրդողանն իր ուկրաինացի գործընկեր Վլադիմիր Զելենսկիի հետ բանակցություններից հետո հայտարարեց, որ Անկարայի դիրքորոշումը Ղրիմի՝ հանրաքվեի միջոցով Ռուսաստանին միանալու վերաբերյալ մնում է անփոփոխ (Անկարան չի ճանաչում Ղրիմի կարգավիճակը՝ որպես Ռուսաստանի սուբյեկտ):
Ըստ Կոսաչյովի, հենց նման իրավիճակներում է փորձության ենթարկվում ազգի հայրենասիրությունը՝ անկախ հանգստի ծրագրերից: Նա նշել է, որ ռուսաստանցիների՝ հայրենական հանգստավայրերը նախընտելու որոշումը հզոր պատասխան կլինի Էրդողանի հայտարարությանը, որն, ի միջի այլոց, ակնկալում է, որ զբոսաշրջիկները նախապատվությունը կտան տաք ծովին, այլ ոչ թե սեփական երկրին:
Միևնույն ժամանակ, փոխխոսնակը ուշադրություն է հրավիրել այն փաստի վրա, որ Ռուսաստանի քաղաքացիներն իրենց հանգիստը ծրագրել են Թուրքիայի ղեկավարի հայտարարությունից առաջ: Այնուամենայնիվ, նա հույս է հայտնել, որ նրանցից շատերը անհնարին կհամարեն մեկնել մի երկիր, որը ոտնձգություն է թույլ տալիս իրենց միլիոնավոր համաքաղաքացիների իրավունքների և ազատությունների նկատմամբ:
Նախօրեին Ռուսաստանը ապրիլի 15-ից հունիսի 1-ը դադարեցրել է ավիահաղորդակցությունը Թուրքիայի հետ՝ այդ երկրում կորոնավիրուսային վարակների թվի աճի պատճառով: Երկրների միջև ավիահաղորդակցությունը կսահմանափակվի շաբաթական երկու՝ Մոսկվա-Ստամբուլ և Ստամբուլ- Մոսկվա չվերթներով: