Օրերս Ռուսաստանի նախագահ Դմիտրի Մեդվեդևը «Էխո Մոսկվի» ռադիոկայանին, Russia Today և «Առաջին կովկասյան» հեռուստաալիքներին տված հարցազրույցում նշել է, որ Հարավային Օսիայի և Աբխազիայի շուրջ 2008 թվականի օգոստոսյան իրադարձությունները «լուրջ դաս էին» Հայաստանի և Ադրբեջանի համար:
«Առաջին լրատվական»-ի հետ զրույցում վրաց քաղաքական վերլուծաբան Պաատա Զաքարեաշվիլին նկատեց, թե այս հայտարարությամբ Ռուսաստանը ցանկանում է ցույց տալ, որ 2008 թվից ի վեր ղարաբաղյան հիմնախնդրի կարգավորման գլխավոր «տերը» Մոսկվան է:
«2008 թվից հետո բոլոր եռակողմ հանդիպումները տեղի են ունեցել Ռուսաստանի միջնորդությամբ, ճիշտ է՝ Մինսկի խմբի օրհնությամբ, սակայն Ռուսաստանը մյուսների նկատմամբ առավելություն ունի»:
Զաքարեաշվիլիի գնահատմամբ՝ Մեդվեդևի հայտարարությունը նշանակում էր, որ իրենք թույլ չեն տալու՝ ղարաբաղյան հարցը լուծվի պատերազմով, անթույլատրելի է բանակցային գործընթացի էսկալացիան, ինչպես նաև լուծումը պետք է լինի այնպիսին, ինչպես կպայմանավորվեն կողմերը Ռուսաստանի հետ՝ անպայմանորեն հաշվի առնելով Ռուսաստանի շահերը:
«Առանց Ռուսաստանի շահերը հաշվի առնելու՝ ոչ Հայաստանը, ոչ Ադրբեջանը չեն կարողանա իրականացնել իրենց պայմանավորվածությունները»,- նկատեց վերլուծաբանը և հավելեց, որ եթե, օրինակ, կողմերը որոշեն հարցը լուծել՝ մուտք գործելով ՆԱՏՕ, ինչը չի համընկնում Ռուսաստանի շահերի հետ, ապա Ռուսաստանը թույլ չի տա իրադարձությունների նման զարգացումը:
