«Այս իրավիճակում բացարձակ իրավական կատեգորիաներով խոսել հնարավոր չէ, որովհետև ստեղծված իրավիճակն ունի ինչպես իրավական, այնպես էլ անխուսափելիորեն քաղաքական հանգուցալուծում. Սահմանադրական դրույթները պետք է օգնեն խնդիրների լուծմանը»,- այս մասին «Առաջին լրատվական»-ի հետ զրույցում նշեց փաստաբան Տիգրան Եգորյանը՝ ընդգծելով, որ մի քանի պատճառով անհաժեշտ է ժողովրդի սուվերենի նոր մանդատ՝ խոսքը ԱԺ ընտրությունների մասին է:
«Դատելով հայտարարություններից՝ իշխանությունը ընտրում է այն ճանապարհը, որն առավելապես կսպասարկի Սահմանդրությամբ առաջադրված հիմնական, անկյունաքարային նպատակները՝ ժողովրդի իշխանության արդյունավետ դրսևորումը և իշխանության ձևավորումը»,- նշեց փաստաբանը:
Եգորյանի դիտարկմամբ՝ թե՛ արտախորհրդարանական, թե՛ խորհրդարանական ընդդիմությունն ունի ստվերային օրակարգ: Նրա խոսքով՝ որոշ ուժերի ստվերային օրակարգը հեղաշրջումն է, ահաբեկչական գործընթացների սպասարկումը և խրախուսումը. «Այդպիսի դրսևորումները ժողովրդի կամքին դեմ են: Եթե իշխանությունը չի ձևավորվելու ընտրությունների միջոցով, ապա խոսքը բախման մասին է: Չեմ կարծում, թե այդ ռիսկը վերացած է»:
Անդրադառնալով դիտարկմանը, որ ԳՇ հայտարարության հետևանքով հնարավոր զարգացումները ձախողվեցին, Եգորյանը կարծիք հայտնեց, որ ԳՇ քայլը իր ազդեցության ամբողջ ներուժը դեռ չի սպառել:
Փաստաբանն անդրադարձավ նաև Լևոն Տեր-Պետրոսյանի վերջին հայտարարությանն այն մասին, որ ստեղծված իրավիճակից լավագույն ելքը վարչապետի հրաժարականն է և արտերկրում ապաստան խնդրելը: Եգորյանի խոսքով՝ առաջին նախագահը որոշակի դիտարկումներ է արել, որոնց արդյունքում եկել է այն եզրահանգման, որ ռիսկեր կան՝ վարչապետի առողջությանը և կյանքին վտանգ է սպառնում, և դրանից փրկվելու համար իր պատկերացրած ճանապարհն է առաջարկել. «Առաջին նախագահի դիտարկմամբ՝ այս ռիսկը ոչ միայն շարունակում է գոյություն ունենալ, այլ այն գրեթե անխուսափելի է»:
Մանրամասն՝ տեսանյութում: