Չերոկի ամերիկյան հնդկացիների առաջնորդ Չակ Հոսկին-կրտսերը Jeep ապրանքանիշին կոչ է արել մեքենաների անվանումներում դադարեցնել օգտագործել ժողովրդի անվանումը: Այս մասին հաղորդում է CNN-ը:
«Ես կարծում եմ, որ մենք ապրում ենք այն օրը, երբ ժամանակն է հրաժարվել բնիկ ամերիկացիների անունները, պատկերներիը և թալիսմանները մեր ապրանքներում օգտագործելուց: Ես վստահ եմ, որ դա արվում է բարի մտադրություններով, բայց մեզ համար պատվաբեր չէ, երբ մեր անունը կպցվում է մեքենայի կողքին»,- ասել է առաջնորդը:
Jeep-ի ներկայացուցիչներն իրենց հերթին նշել են, որ անվան ընտրությունը պայմանավորված է եղել «հնդիկներին իրենց ազնվության, քաջության և հպարտության համար պատվելու և փառաբանելու» ցանկությամբ, և ընդգծել են նաև, որ իրենք տրամադրված են հարգալից և բաց երկխոսության:
Jeep-ն իր մեքենաներին Cherokee անվանումն է տվել 1974 թվականից, երբ առաջին անգամ ներկայացվեց Jeep Cherokee մեքենան, իսկ 1993 թվականին թողարկվեց Jeep Grand Cherokee-ն: