ԿԺԴՀ իշխանությունները շահագործում են քաղբանտարկյալներին, այդ թվում՝ երեխաներին՝ ածուխ արդյունահանելու համար: Հանածոն այնուհետև արտահանվում է, իսկ արտարժույթի տեսքով ստացված հասույթը ծախսվում է Փհենյանի հրթիռա-միջուկային ծրագրի զարգացման վրա: Այսպիսի եզրահանգման է եկել Սեուլում տեղակայված Հյուսիսային Կորեայում Մարդու իրավունքների պաշտպանության քաղաքացիական դաշինքը, հաղորդում է Reuters-ը:
Ներկայումս գործում է ՄԱԿ-ի՝ Հյուսիսային Կորեայի կողմից այդ էներգետիկ ռեսուրսի վաճառքի արգելքը: Պատժամիջոցները սահմանվել են Փհենյանի կողմից զանգվածային ոչնչացման զենք ստեղծելու համար ֆինանսավորումը դադարեցնելու նպատակով: ՄԱԿ-ի գնահատմամբ, աշխատանքային ճամբարներում, որոնցից շատերը գտնվում են օգտակար հանածոների արդյունահանման վայրերի մոտ, այժմ մոտ 200.000 մարդ է պահվում: Ըստ ՄԱԿ-ի 2014թ.-ի զեկույցի, բանտարկյալները բախվում են խոշտանգումների, բռնաբարությունների, հարկադիր աշխատանքի, սովի և անմարդկային վերաբերմունքի այլ ձևերի:
